មេដឹកនាំមួយរូបដែលមានសមត្ថភាព គឺមានជំនាញពិតប្រាកដភាពវៃឆ្លាត ចំណេះដឹងទូទៅខ្ពស់...។ ទន្ទឹមនេះចំណេះពិតនៅជាប់ខ្លួន ក៏ជាធាតុចាំបាច់មិនអាចខ្វះបាន។ ដូចនេះ តើចំណេះដឹងពិត ជាអ្វីទៅ? តាមលោក ពឹង គិមឆេន ជាគ្រូឧទ្ទេស នៃកម្មវិធីបណ្តុះបណ្តាលជាសាធារណៈក្រោមប្រធានបទស្តីពី“ឧត្តមានុវត្តន៍នៃភាពជាអ្នកដឹកនាំ” លោកបានចែករំលែកពីចំណេះដឹងពិតនេះដូចខាងក្រោម៖
ចំណះដឹងពិតតាមរយៈលោក គិមឆេន បានចែកជាពីរផ្នែកគឺជាបណ្ឌិតពុទ្ធិចក្រ និងបណ្ឌិតអាណាចក្រ
***បណ្ឌិតពុទ្ធិចក្រ
១. ប្រតិបត្តិចិត្តកាយឱ្យបរិសុទ្ធ
ចំណុចនេះ លោកគ្រូគិមឆេន បានលើកឡើងពីបុគ្គលអ្នកដឹកនាំដែលនៅក្នុងផ្លូវពុទ្ធសាសនា គឺជាអ្នកដែលបានប្រតិបតិ្តកាយចិត្ត បានល្អបរិសុទ្ធមានចិត្តស្អាត មិនប្រាសចាកសីលធម៌ គុណធម៌។
២. ញ៉ាំងឱ្យអ្នកដទៃបរិសុទ្ធ
ចំណុចនេះ លោកគ្រូបានលើកឡើងថា អ្នកដឹកនាំក្នុងពុទ្ធិចក្រមិនត្រឹមតែប្រតិបត្តិខ្លួនឯងឱ្យមានការរស់នៅល្អ ចិត្តកាយបរិសុទ្ធ ថែមទាំងមានចិត្តចង់ណែនាំឱ្យអ្នកដទៃធ្វើបានល្អប្រសើរនូវចិត្តកាយល្អបរិសុទ្ធនេះផងដែរ ដែលនាំឱ្យពួកគេចាកចេញពីភាពសៅហ្មងទាំងឡាយ។
៣. សង្គ្រោះចែករំលែកដល់អ្នកដទៃ
បណ្ឌិត អ្នកដឹកនាំ អ្នកមានចំណេះដឹងក្នុងផ្លូវពុទ្ធចក្ររមែងជាអ្នកចេះសង្រ្គោះដល់អ្នកផងគ្នា ក៏ដូចជាចេះចែករំលែកអ្វីមានដល់អ្នកដទៃ ជាប្រយោជន៍ពោលគឺជាអ្នកដែលមានធម៌នៅក្នុងខ្លួន។
៤. កត្តញ្ញូដឹងខុសត្រូវ ស្គាល់គុណទោស
បណ្ឌិតពុទ្ធិចក្រ រមែងជាអ្នកស្គាល់គុណស្គាល់ស្គាល់បាប ស្គាល់បុណ្យ ដឹងនូវអ្វីដែលគួរធ្វើ និងមិនគួរធ្វើ ដឹងខុសត្រូវ ជាពិសេសគឺការដឹងគុណជាអ្នកកត្តញ្ញូចំពោះមាតាបិតា…។
ដោយឡែកចំណេះដឹងពិតមួយទៀតដែលទទួលបានតាមរយៈគ្រឹះស្ថានសិក្សាដែលលោកហៅថា បណ្ឌិតអាណាចក្រ ដែលលក្ខណៈចំណេះដឹងពិតមួយនេះ គឺទទួលបានរយៈការបង្កើនសមត្ថភាពរៀនសូត្រសិក្សា និងអាចសម្គាល់បានតាមរយៈកម្រិតសញ្ញាបត្ររបស់ពួកគេ ដែលទទួលបានរយៈគ្រឹះស្ថានសិក្សានោះដែលមានជាកម្រិតទី១ គឺសញ្ញាបត្របរិញ្ញាបត្រ ទី២បរិញ្ញាបត្រជាន់ខ្ពស់(អនុបណ្ឌិត) និងទី៣គឺសញ្ញាបត្របណ្ឌិតនោះឯង៕
