រាជធានីភ្នំពេញ៖ បើទោះបីជាប្រទេសកម្ពុជា-ថៃ កំពុងប្រឈមនឹងវិបត្តិកូវីដ១៩ក៏ដោយ ទំហំពាណិជ្ជកម្មទេ្វភាគីរវាងប្រទេសទាំងពីរនេះ ក្នុងរយៈពេល៨ខែឆ្នាំ២០២១នេះ សម្រេចបាន ៥.២៤ប៊ីលានដុល្លារអាមេរិក កើនឡើងប្រមាណ ១១% បើធៀបនឹងរយៈពេលដូចគ្នានៃឆ្នាំមុន ដែលមានទឹកប្រាក់ ៥.០៨ប៊ីលានដុល្លារអាមេរិក ។
របាយការណ៍នេះបានបញ្ជាក់ថា ការនាំចេញរបស់កម្ពុជាទៅថៃពីខែមករា ដល់ខែសីហាមានតម្លៃសរុប ៦២៣លានដុល្លារអាមេរិក និងនាំចូលពីថៃមានតម្លៃសរុប ៤.៦១ប៊ីលានដុល្លារអាមេរិក ដែលបង្កើតឱ្យមានឱនភាពទំហំពាណិជ្ជកម្មនៃប្រទេសទាំងពីរចំនួន ៣.៩៩ប៊ីលានដុល្លារអាមេរិក។
សូមជម្រាបជូនដែរថា ទំនិញដែលកម្ពុជានាំចេញទៅប្រទេសថៃភាគច្រើន គឺផលិតផលវាយនភណ្ឌ កសិផលត្បូងថ្មមានតម្លៃ វត្ថុធាតុដើមវិស័យ និងទំនិញពាក់កណ្តាលសម្រេច ខណៈប្រទេសកម្ពុជា បាននាំចូលពីថៃមកវិញនូវ ថាមពល ត្រី សាច់ បន្លែ និងផលិតផលសម្រេចដូចជា រថយន្ត ជីសរីរាង្គ ស៊ីម៉ង់ គ្រឿងឧបភោគ-បរិភោគ គ្រឿងសំអាង និងសម្ភារសំណង់។
បើតាមរបាយការណ៍ពីស្ថានទូតកម្ពុជាប្រចាំប្រទេសថៃ បានបន្តថា សម្រាប់នៅក្នុងខែសីហា នេះ ការនាំចេញរបស់កម្ពុជាទៅថៃ មានតម្លៃ ៥៤.៥លានដុល្លារអាមេរិក ថយចុះប្រមាណ ២៥% ធៀបនឹងខែដូចគ្នា នៃឆ្នាំ២០២០ ដែលមានទឹកប្រាក់ ៧៣.១លានដុល្លារអាមេរិក។ ចំណែកឯការនាំចូលពីថៃ មានតម្លៃ ៥៧១លានដុល្លារអាមេរិក កើនឡើង ២៨% ធៀបនឹងខែដូចគ្នា នៃឆ្នាំ២០២០ ដែលមានទឹកប្រាក់ ៤៤៥លានដុល្លារអាមេរិក។
