រាជធានីភ្នំពេញ៖ ក្រសួងសុខាភិបាល បានប្រកាសពីការរកឃើញវីរុសកូវីដ-១៩ បំប្លែងថ្មី B.1.617.2 (Delta) ចំនួន៦៧ករណីទៀត (នៅថ្ងៃទី៤ និងថ្ងៃទី៥ ខែសីហា ឆ្នាំ២០២១) ដែលក្នុងនោះ រាជធានីភ្នំពេញត្រូវបានរកឃើញរហូតដល់ចំនួន ៣៤ករណី ដែលភាគច្រើនជាអ្នកដំណើរពីក្រៅប្រទេស និងជំងឺ Delta ១ករណីក៏ត្រូវបានរកឃើញលើអ្នកលក់នំបញ្ចុក នៅទួលសង្កែ ក្នុងរាជធានីភ្នំពេញផងដែរ។
សូមជម្រាបជូនដែរថា គិតចាប់ពី ៣១មីនា ២០២១ ដល់ត្រឹមថ្ងៃទី ៥សីហា ២០២១នេះ កម្ពុជារកឃើញការឆ្លងជំងឺប្រភេទ Delta ថ្មីនេះចំនួន សរុប ៣២៧នាក់ (ស្រ្ដី ១៥៧) ដែលរកឃើញលើពលករមកពីប្រទេសថៃ អ្នកដំណើរតាមជើងយន្តហោះ បុគ្គលិកសុខាភិបាល និងក្នុងសហគមន៍។
ខេត្តដែលមានការឆ្លងប្រភេទថ្មីនេះខ្លាំង មាននៅឧត្តរមានជ័យ រាជធានីភ្នំពេញ សៀមរាប ព្រះវិហារ កំពង់ចាម និងកំពង់ធំ និងបណ្ដាខេត្តតាមព្រំដែន៕
