ឥទ្ធិពលពីព្យុះជាបន្តបន្ទាប់មកលើព្រះរាជាណាចក្រកម្ពុជា បានធ្វើឱ្យតំបន់មួយចំនួននៅតាមរាជធានីនិងខេត្តមួយចំនួនជន់លិចដោយសារជំនន់ទឹក។ វិធានការឆ្លើយតបបន្ទាន់ពីក្រសួងនិងរដ្ឋបាលអាជ្ញាធរក្នុងមូលដ្ឋានក៏បានចេញផ្សាយសម្រាប់បង្ការនិងការពារសុវត្ថិភាពដល់ប្រជាពលរដ្ឋ។ ជាមួយគ្នានេះ ចំណុចរួមមួយចំនួនដែលចេញផ្សព្វផ្សាយពីស្ថាប័នជំនាញទាក់ទងនឹងគ្រោះមហន្តរាយធម្មជាតិទាំងជាតិ និងអន្តរជាតិបានបង្ហាញជាចំណុចមួយចំនួនដែលយើងអាចស្វែងយល់ដើម្បីរក្សាសុវត្ថិភាពនិងបង្ការខ្លួនពីគ្រោះធម្មជាតិទឹកជំនន់នេះ៖
***អំឡុងពេលមានទឹកជំនន់
អ្នកអាច ស្វែងរកជំនួយពីបងប្អូន ឬមិត្តភក្តិ ដែលពួកគេមានទីតាំងទីទួលសុវត្ថិភាព ឆ្ងាយពីជំនន់ទឹក សម្រាប់ការស្នាក់នៅបណ្តោះអាសន្ន ជាមួយគ្នានេះ អ្នកក៏គួរប្រកាន់ភ្ជាប់អនាម័យ ដើម្បីសុខភាព ព្រមទាំងបង្ការពី COVID-19 ផងដែរ។
អនុវត្តតាមការជូនដំណឹងរបស់អាជ្ញាធរ ករណីទទួលដំណឹងពីការជម្លៀសទៅកាន់ទីតាំងសុវត្ថិភាព។
ប្រសិនបើអ្នកឈឺ ឬត្រូវការសេវាសុខភាព គួរទាក់ទងទៅកាន់ ស្ថាប័ន ឬមណ្ឌលសេវាសុខភាព ដែលនៅជិតអ្នកបំផុត ដើម្បីទទួលបានសេវាភ្លាមៗ។
តាមដានព័ត៌មានពី ស្ថានភាពទឹកជំនន់ជាប្រចាំ។
កុំព្យាយាមដើរ ឬឆ្លងកាត់តាមទីតាំងទឹកជំនន់ ដែលអាជ្ញាធរបានហាមប្រាម ឬទីតាំងទឹកជន់ផ្សេងៗ។
ព្យាយាមនៅចៀសឆ្ងាយពីតំបន់ទំនប់ទឹក ដែលមានលំហូរទឹកខ្លាំង លឿន។
ករណីជាប់នៅក្នុងឡាន (ករណីមួយចំនួន) ដោយមានទឹកជន់ជុំវិញ ព្យាយាមរកច្រកចេញ ឬផ្លូវចេញពីឡានភ្លាមៗ ដើម្បីសុវត្ថិភាពខ្លួន។
ករណីជាប់នៅក្នុងអគារ (ករណីមួយចំនួន) ដោយមានទឹកជន់ជុំវិញ ព្យាយាមរកផ្លូវទៅកាន់ផ្នែកខាងលើនៃអគារ ឬដំបូលអគារ និងធ្វើសញ្ញាដើម្បីរកជំនួយ សង្គ្រោះ។
***ក្រោយពេលទឹកជំនន់
បន្តតាមដានស្ថានការណ៍ព័ត៌មានពីអាកាសធាតុ និងទឹកជំនន់ និងត្រឡប់ទៅកាន់គេហដ្ឋានវិញ លុះណាតែ មានការជូនដំណឹងពីអាជ្ញាធរមូលដ្ឋាន អំពីសុវត្ថិភាពក្រោយទឹកជំនន់។
ប្រុងប្រយ័ត្ននូវ ពពួកសត្វពស់ ឬអាសិរពិសផ្សេងៗ នៅក្នុងផ្ទះ ក្រោយស្ថានការណ៍ទឹកជន់។ ប្រើប្រាស់នូវស្រោមដៃ សំលៀកបំពាក់ជិតៗ ឬស្បែកជើងក្រាស់ការពារ អំឡុងពេលសម្អាតផ្ទះ ក្រោយទឹកជំនន់។
ប្រុងប្រយ័ត្នជានិច្ចនូវប្រព័ន្ធអគ្គិសនីក្រោយពេលទឹកជំនន់ បិទរាល់ប្រព័ន្ធអគ្គិសនីក្នុងផ្ទះ នៅពេលសម្អាត ករណីមានបញ្ហា គួរមានជាងជំនាញទៅជួសជុល។
កុំប្រើប្រាស់ ឬបរិភោគចំណីអាហារដែលបានប៉ះពាល់នឹងទឹកជន់ ដើម្បីបង្ការសុខភាពពីជំងឺផ្សេងៗ
ព្យាយាមជួយគ្នាទៅវិញទៅមក នៅពេលមាននរណាម្នាក់ត្រូវការជំនួយពីអ្នក តាមលទ្ធភាពដែលអាចធ្វើបាន៕
