ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានណែនាំដល់រដ្ឋមន្រ្តី និងអភិបាលខេត្តនានា ឱ្យបញ្ឈប់ការស្នើចាក់វ៉ាក់សាំងតាមបណ្ដាខេត្តជាដុំៗ ដោយតំបន់ខ្លះមិនទាន់ស្ថិតក្នុងអាទិភាពនៅឡើយ។
ផែនការយុទ្ធសាស្រ្តចាក់វ៉ាក់សាំងដែលកម្ពុជាបានប្រើ គឺ«យុទ្ធសាស្រ្តផ្ការីក» ដោយចាក់ពីក្នុងចេញក្រៅ តាមរយៈការចាក់ស្រោចវ៉ាក់សាំងជាបន្តបន្ទាប់តាមលំដាប់លំដោយ នៃរាជធានី-ខេត្តអាទិភាព និងការធ្វើឡើងដោយចាក់ស្រោចតំបន់នីមួយៗតែម្ដង។
សម្តេចតេជោបានបញ្ជាក់៖ «យើងមិនអាចចាក់វ៉ាក់សាំងដល់កម្មករដែលមានត្រឹមតែ ៤-៥ម៉ឺននាក់ នៅក្នុងខេត្តមួយដែលមានប្រជាជនជាង១លាននាក់បានទេ។ អញ្ចឹងនៅពេលដែលយើងចុះទៅគឺយើងចុះទៅចាក់ស្រោចតែម្តង បើមិនបានទៅដល់ជនបទទេ ក៏យើងប្រមូលចាក់ទីក្រុង ទីប្រជុំជន និងកន្លែងដែលមានកម្មកររស់នៅកកកុញ និយាយរួមកន្លែងដែលកកកុញតែម្តង ធ្វើដូច្នេះទើបមានភាពសុាំក្នុងសហគមន៍»។
សូមជម្រាបដែរថា ក្នុងយុទ្ធការដំបូងនៃការចាក់វា៉ក់សាំង នៅតាមបណ្ដាខេត្តក៏ធ្លាប់បានចាក់វ៉ាក់សាំងខ្លះរួចមកហើយ សម្រាប់មន្រ្តីរាជការ កងកម្លាំងប្រដាប់អាវុធ និងប្រជាជនស្ថិតក្នុងចង្កោមអាទិភាព។
បច្ចុប្បន្ននេះ រាជធានីភ្នំពេញ និងខេត្តកណ្តាល គឺជាតំបន់អាទិភាពក្នុងការចាក់វ៉ាក់សាំងការពារកូវីដ១៩ ទ្រង់ទ្រាយធំ។ សម្រាប់ខេត្តផ្សេងទៀត នឹងត្រូវបានពិនិត្យជាបន្តបន្ទាប់ ទៅតាមសង្វាក់នៃដំណើរការតាមផែនការ។
គិតត្រឹមថ្ងៃទី ២៨ឧសភា តាមទិន្នន័យសរុបនៃការចាក់វ៉ាក់សាំងកូវីដ១៩ទូទាំងប្រទេស៖ អ្នកបានចាក់សរុបចំនួន ២,៤៦៤,៨៣៥នាក់។ អ្នកដែលគ្រូពេទ្យមិនអនុញ្ញាត ៥១ ៦២៨នាក់៕
