ក្នុងនាមជាឪពុកម្តាយ ពេលខ្លះត្រូវរវល់ខ្លាំង ត្រូវធ្វើការផងហើយត្រូវជាប់កាតព្វកិច្ចមើលកូនៗផង ដើម្បីជីវភាពរស់នៅប្រចាំថ្ងៃ។ទន្ទឹមនឹងភាពចាំបាច់ត្រូវធ្វើនោះ ប៉ា ម៉ាក់ ក៏ត្រូវនាំកូនៗទៅកន្លែងធ្វើការជាមួយផង ប៉ុន្តែជាមួយនឹងសកម្មភាពនោះត្រូវបានអ្នកជំនាញសិក្សា បង្ហាញថានឹងផ្តល់ប្រយោជន៍រយៈពេលវែងទៅដល់ទាំងឪពុកម្តាយ កូនៗដោយកត្តាសម្ព័ន្ធភាពគ្រួសារ និងបំនិនជីវិត ដែលមានដូចខាងក្រោម៖
១. បង្រៀនឱ្យកូនយល់ពីតម្លៃនៃការអង្កេតស្វែងយល់ទូទៅ
តាមប្រភពទស្សនាវដ្តីស្រាវជ្រាវ Forbes បានឱ្យដឹងថាការនាំកូនតូចៗទៅដល់ បរិស្ថានកន្លែងការងារ ធ្វើការឬកន្លែងបំពេញសកម្មភាពរកចំណូលដើម្បីទ្រទ្រងការរស់នៅប្រចាំថ្ងៃ គឺប្រៀបបានបង្រៀន និងមានឥទ្ធិពលវិជ្ជមានដល់ពួកគេឱ្យយល់ខ្លះៗនូវសកម្មភាពជំនាញមួយ ឬភាពប៉ិនប្រសប់មួយនៃការងារហើយធ្វើឱ្យគេចេះស្វែងយល់នូវ សកម្មភាពផ្សេងៗទៀត នៅពេលដែលគេជួបប្រទះនៅពេលពួកគេធំឡើង។
២. បង្រៀនឱ្យកូនៗឱ្យយល់ពីពេលលំបាករបស់ប៉ា និងម៉ាក់
តាមការឱ្យដឹងពីអ្នកជំនាញសិក្សា កូនៗតូច ពិតជាចង់ដឹងចង់ឮពីរឿងរ៉ាវប្រចាំថ្ងៃរបស់ម៉ាក់ និងប៉ារបស់ពួកគេ។ ដូចនេះការបង្ហាញឱ្យអូនៗ ឃើញពីពេលវេលានៃការបំពេញការងារដែលត្រូវប្រឈមនឹងភាពលំបាក ទៅដល់កូនៗ នឹងបង្ហាញឱ្យគេចេះស្វែងយល់នូវ ការលះបង់និងភាពអត់ធន់នឹងវេលាលំបាក និងតួនាទីដោះស្រាយបញ្ហា របស់ប៉ានិងម៉ាក់ ពេលជួបបញ្ហា។ ហើយសកម្មភាពនេះ នឹងមានឥទ្ធិពលនិងគំរូល្អដល់ពួកគេ ក្នុងរយៈពេលវែងទៀតផងពោលគឺភាពម្ចាស់ការក្នុងការដោះស្រាយបញ្ហា។
៣. បង្កើនសម្ព័ន្ធភាពគ្រួសាររឹងមាំ
ពេលកូនៗនៅកន្លែងធ្វើការរបស់ឪពុកម្តាយប្រាកដណាស់សំណួរចេញពីចម្ងល់កូនៗ នឹងកើតមាន សួរទៅប៉ា ឬម៉ាក់ជាអ្នកឆ្លើយ។ បទពិសោធន៍ទាំងនោះ នឹងនាំឱ្យយើង ជាប៉ា ជាម៉ាក់ ផ្សារភ្ជាប់នឹងកូនៗក្នុងចំណងសម្ព័ន្ធភាពគ្រួសាររឹងមាំ ដែលនៅថ្ងៃណាមួយ ពេលពួកគេធំឡើងគេនឹងនឹករលឹកដល់ បទពិសោធដែលអ្នកបានចែករំលែកដែលជាដំបូន្មានសម្រាប់បំនិនជីវិតដែលពួកគេមិនអាចភ្លេចបាន។
៤. បង្រៀនឱ្យកូនៗ យល់នឹងគោរពតម្លៃនៃការលះបង់របស់ប៉ាៗនិងម៉ាក់ៗ
ពេលអូនៗ ឃើញប៉ាៗ ម៉ាក់ៗ ហត់នឿយ តែនៅតែញញឹម និងនិយាយល្អៗដាក់កូនៗ ជាធម្មជាតិពួកគេ និងគោរពស្រលាញ់ប៉ាៗ ម៉ាក់ៗគេនិងយល់តម្លៃនៃការលះបង់ ក្នុងតួនាទីជាម៉ាក់ប៉ាផង និងជាអ្នករកថវិកាជួយដល់គ្រួសារទាំងមូលផង។
៥. ឱ្យកូនៗយល់ពីការរស់នៅក្នុងសង្គម
ពិតណាស់ កន្លែងការងារ ធ្វើការ រកស៊ី ជាសហគមន៍មួយដែលត្រូវមានទំនាក់ទំនង ធ្វើការជាមួយគ្នាទៅវិញទៅមក។ បរិយាកាសនេះនឹងឱ្យកូនបានចេះស្វែងយល់ដោយខ្លួនឯង ចេះក្លាហានចេះប្រាស្រ័យទាក់ទងជាមួយមនុស្សជុំវិញខ្លួនពួកគេដែលសុទ្ធសឹងមានឥទ្ធិពលល្អៗទៅក្នុងសង្គម។ លើសពីនេះបរិយាកាសការងាររបស់ម៉ាក់ៗ និងប៉ាៗ របស់ពួកគេនឹងធ្វើឱ្យពួកគេចេះស្វែងយល់ជាបន្តបន្ទាប់ នូវអ្វីដែលពួកគេជួបប្រទះសម្រាប់ជាទុនរស់នៅ និងបំពេញការងារ ក្នុងជំនាន់របស់ពួកគេ៕
