តាមការឱ្យដឹងពីក្រុមគ្រូពេទ្យនៃមន្ទីរពេទ្យកាល់ម៉ែត្រ ការមានអារម្មណ៍សោកសៅមួយរយៈពេលខ្លី ហើយបាត់ទៅវិញក្នុងរវាងពីរបីម៉ោង ទៅពីរ បីថ្ងៃ គឺពុំមែនជាជំងឺធ្លាក់ទឹកចិត្តនោះទេ។ ក៏ប៉ុន្តែ ពេលខ្លះអារម្មណ៍សោកសៅអាចមានកម្រិតខ្លាំង និងយូរលើសពី២សប្តាហ៍ ហើយធ្វើឱ្យរំខានដល់ការងារ និងការប្រាស្រ័យទាក់ទងប្រចាំថ្ងៃទៀតផង ដែលស្ថានភាពបែបនេះ ត្រូវហៅបានថាជាជំងឺធ្លាក់ទឹកចិត្ត។ តាមការលើកឡើងរបស់វេជ្ជបណ្ឌិតអ្នកជំងឺធ្លាក់ទឹកចិត្ត ច្រើនមានរោគសញ្ញាសំខាន់ៗរួមមាន៖
- មានអារម្មណ៍សោកសៅ
- លែងចង់ធ្វើអ្វី
- អស់កម្លាំងជាប់ជាប្រចាំ
ហើយក្រៅពីនេះ អ្នកជំងឺធ្លាក់ទឹកចិត្ត ក៏អាចមានអាការៈមួយចំនួនទៀតដូចជា៖
- លែងមានជំនឿជឿជាក់លើខ្លួនឯង
- មានអារម្មណ៍បន្ទោសខ្លួនឯងស្អប់ខ្លួនឯង គិតថាជីវិតគ្មានន័យ ឬគិតដល់ការសម្លាប់ខ្លួន។
- រសេសរសោះ ឬអាចទៅជានិយាយស្តីឬធ្វើសកម្មភាពយឺតៗ
- ពិបាកផ្ចង់អារម្មណ៍
- ភ្លេចភ្លាំងច្រើន
- ពិបាកគេងលក់
- គេងឆាប់ភ្ញាក់ ឬអាចទៅជាចេះតែចង់គេង
- មិនឃ្លានអាហារ ឬអាចទៅជាញ៉ាំច្រើនខុសពីធម្មតាក៏មាន
គ្រូពេទ្យបានបន្ថែមទៀតថាការមានជំងឺធ្លាក់ទឹកចិត្តមិនមែនមានន័យថាអ្នកទន់ខ្សោយ ឬខ្ជិលច្រអូសនោះទេ។ វាជាជំងឺដែលគេឧស្សាហ៍ជួបប្រទះដូចគ្នា នឹងជំងឺលើសឈាមទឹកនោមផ្អែម ឬរលាកសន្លាក់ដែរ។ ថ្វីបើវាអាចជាឃាតករលាក់មុខដែលអាចឆក់យកជីវិតយើងបានក្តីតែជំងឺធ្លាក់ទឹកចិត្តអាចព្យាបាលបានប្រកបដោយប្រសិទ្ធិភាព៕
