ក្នុងយុគសម័យបច្ចេកវិទ្យានេះ មនុស្សចាប់ផ្តើមរស់នៅជាមួយបច្ចេកវិទ្យាច្រើនឡើងៗ រហូតស្ទើរតែគ្មានជីវិតជាក់ស្តែង ដែលកត្តានេះ ធ្វើឱ្យមានការព្រួយបារម្ភខ្លាំង ចំពោះការកសាងសេចក្តីសុខ និងសុភមង្គលក្នុងការរស់នៅសម្រាប់ជីវិតមនុស្សនាពេលអនាគត។
លោកបណ្ឌិត Patrick Dixon អ្នកជំនាញផ្នែកយុទ្ធសាស្រ្តនៃក្រុមហ៊ុនជាច្រើននៅលើពិភពលោក បានបង្ហាញថា បច្ចុប្បន្ននេះ មនុស្សចាប់ផ្តើមញៀនជាមួយនឹងប្រព័ន្ធឌីជីថល ដែលធ្វើឱ្យពួកគេត្រូវប្រឈមនឹងការរស់នៅជាមួយជីវិតដែលពោរពេញដោយភាពថប់អារម្មណ៍ ធ្លាក់ទឹកចិត្ត និងការបែកបាក់ផ្លូវចិត្ត។ លោកថា បើតាមការស្រាវជ្រាវក្មេងអាយុចាប់ពី១៥ឆ្នាំ ដល់២៥ឆ្នាំ នៅចក្រភពអង់គ្លេស បានចំណាយពេលជាមធ្យមប្រមាណ ៤ម៉ោងក្នុងមួយថ្ងៃ លើឧបករណ៍អេឡិចត្រូនិក ដោយពួកគេចូលទៅមើលសាររៀងរាល់ ៩នាទីម្តង។
ងាកមកហ្វីលីពីនវិញ តាមការស្ទង់មតិឆ្នាំ២០១៩ បានឱ្យដឹងថា ប្រជាជនទូទៅចំណាយពេលនៅជាមួយបច្ចេកវិទ្យានិងបណ្តាញសង្គមជាដើម ប្រមាណ ១០ម៉ោងក្នុងមួយថ្ងៃ។ ចំនួននេះមិនសូវខុសគ្នាប៉ុន្មាននោះទេ ជាមួយបណ្តាប្រទេសនៅក្នុងតំបន់អាស៊ីផ្សេងៗទៀត។ តាមការស្ទង់មតិដដែលបានបញ្ជាក់ថា នៅប្រទេសថៃ ប្រជាជនជាមធ្យមប្រើប្រាស់អ៊ីនធើណិតរយៈពេលជាង ៩ម៉ោង ខណៈនៅប្រទេសកម្ពុជាយើង គេរកឃើញថាប្រជាជនជាមធ្យមប្រើប្រាស់អ៊ីនធើណិតត្រឹម ៩ម៉ោងគត់ក្នុងមួយថ្ងៃ។
ស្រដៀងគ្នានេះដែរ បើមើលទៅប្រទេសឥណ្ឌូណេស៊ីវិញ បានបង្ហាញថាប្រជាជនចំណាយពេលរស់នៅជាមួយអ៊ីនធើណិត៨ម៉ោងកន្លះ ខ្ពស់ជាងសហរដ្ឋអាមេរិកនិងចិន ដែលប្រជាជនចំណាយពេលវេលាត្រឹងមរង្វង់ ៦ម៉ោងក្នុងមួយថ្ងៃជាមួយនឹងបច្ចេកវិទ្យា។
បើតាមការស្រាវជ្រាវរបស់អ្នកជំនាញខាងលើបានឱ្យដឹងថា ជាមធ្យមមនុស្សលើពិភពលោកចំណាយពេលវេលាជាទូទៅជិត ៧ម៉ោងក្នុងមួយថ្ងៃលើការប្រើប្រាស់បច្ចេកវិទ្យា។ ហើយចំនួននេះនឹងកើនឡើងបន្ថែមទៀតនៅឆ្នាំ២០៣០។
បើមើលលើចំនួននៃការកើនឡើងនូវរយៈពេល ដែលមនុស្សប្រើបណ្តាញបច្ចេកវិទ្យានេះយើងឃើញថា ប្រជាជនកាន់តែច្រើនកំពុងចេញពីជីវិតពិត ហើយងាកមករស់នៅក្នុងពិភពបច្ចេកវិទ្យា។ កត្តានេះអាចនឹងធ្វើឱ្យចំនួនអ្នករងផលប៉ះពាល់ផ្នែកផ្លូវចិត្តកើនឡើង ដែលជាចរន្តមួយធ្វើឱ្យមានករណីអត្តឃាត ឬបញ្ហាស្មុគស្មាញនានាកើនឡើងលើពិភពលោក។ ហេតុនេះអ្វីដែលយើងអាចធ្វើបាន គឺចាប់ផ្តើមងាកមករស់នៅក្នុងជីវិតជាក់ស្តែង ដែលពោរពេញដោយភាពស្រស់បំព្រងនៃធម្មជាតិ ធ្វើសកម្មភាពនានាដើម្បីបរិស្ថាន ឬបង្កើនភាពរីករាយជាមួយនឹង ការជួបជុំដោយផ្ទាល់ឱ្យបានច្រើនជាងការរស់នៅតែមុខអេក្រង់៕
