ការបង្កើតទម្លាប់ច្នៃប្រឌិត ទោះជាទម្លាប់តូចតាច រាប់តាំងពីការបង្កើតឃ្នាបសៀវភៅស្រស់ស្អាត ការបង្កើតស៊ុមរូបថតដោយខ្លួនឯង... នឹងជួយដល់សុខភាព ទាំងរាងកាយ និងខួរក្បាលបាន នេះបើតាមការលើកឡើងតាមរយៈការស្រាវជ្រាវវិទ្យាសាស្រ្ត។
គំនិតនិងការអនុវត្តបែបច្នៃប្រឌិត នាំឱ្យមានអភិវឌ្ឍទៅដល់មុខងារខួរក្បាល សកម្មភាពរស់នៅប្រចាំថ្ងៃដ៏សកម្មនិងឥទ្ធិពលវិជ្ជមានមួយចំនួនទៅលើអារម្មណ៍។ ខាងក្រោមនេះ ជាហេតុផលដែលក្រុមអ្នកវិទ្យាសាស្រ្តបានលើកឡើង៖
១.បង្កើតសុភមង្គល (ភាពរីករាយ)
ដោយផ្អែកតាមទ្រឹស្តីលំហូររបស់អ្នកវិទ្យាសាស្រ្ត បានពន្យល់ថា អ្នកនឹងទទួលបានភាពរីករាយនៅពេលអ្នកបានសម្រេចអ្វីមួយដោយការខំប្រឹងប្រែងពីគ្រប់លទ្ធភាពផ្សេងៗ។ ជាមួយ គ្នានោះដែរ ភាពរីករាយនោះ គឺបានកើតមកពីការជម្រុញចិត្តក្នុងខ្លួនអ្នកដោយផ្តោតសំខាន់ទៅលើ វិធីសម្រេចសមិទ្ធិផល ដូចនេះ ធ្វើឱ្យអ័រម៉ូន Dopamine កើតឡើងក្នុងខួរក្បាលធ្វើឱ្យអារម្មណ៍អ្នករីករាយ ហើយ នាំឱ្យទម្លាប់បង្កើតរឿងល្អៗ។ វិធីច្នៃប្រឌិតទាំងនោះនឹងធ្វើឱ្យអារម្មណ៍ល្អកើតឡើង និងជម្រុញចិត្តកាន់តែរីករាយ។
២.កាត់បន្ថយភាពរវើរវាយ
ទម្លាប់រកគំនិតច្នៃប្រឌិតនឹងបន្ថយភាពរវើរវាយ។ ការសិក្សាជាច្រើនកន្លងទៅ បានបង្ហាញថាអ្នកដែលមានទម្លាប់រវើរវាយ នៅពេលទទួលបានចំណែកមួយនៃភាពច្នៃប្រឌិតចូលក្នុងសកម្មភាពប្រចាំថ្ងៃរបស់ពួកគេ ធ្វើឱ្យពួកគេចាប់ផ្តើមសះស្បើយដោយផ្តោតអារម្មណ៍ទៅលើបុគ្គលិកលក្ខណៈជាតម្លៃផ្ទាល់ខ្លួននិងពង្រឹងស្មារតីរបស់ពួកគេ។
៣.បង្កើនសុខភាពផ្លូវចិត្ត
ក្នុង១ថ្ងៃមនុស្សម្នាក់មានគំនិត ឬការគិតប្រហែល ៦០ ០០០ដង។ ដោយឡែកសម្រាប់គំនិតច្នៃប្រឌិត និងជួយឱ្យ អារម្មណ៍និងចិត្តផ្តោតទៅលើរឿងមានប្រយោជន៍ថ្មីមួយ ដែលបៀបដូចនឹងការធ្វើសមាធិមួយផងដែរ។ ហើយទម្លាប់បែបនោះនឹងកាត់បន្ថយអារម្មណ៍ច្របូកច្របល់ផ្សេងៗ ដូចជាភាពអន្ទះអន្ទែង ស្រ្តេស ថប់អារម្មណ៍ជាដើម។ ហើយភាពច្នៃប្រឌិត រាប់តាំងពី ការគូរគំនូរសរសេររឿងប្រលោមលោក ឬសិល្បៈផ្សេងៗ-ល-។
៤.ជួយជម្រុញមុខងារប្រព័ន្ធភាពស៊ាំក្នុងខ្លួនអ្នក
អ្នកវិទ្យាសាស្រ្តបានរកឃើញថា សូម្បីតែការស្តាប់ចម្រៀងថ្មីៗ វាបានជម្រុញសមាសធាតុគីមីម្យ៉ាងក្នុងខ្លួន ឈ្មោះថា CD4+Lymphocyte ដែលជួយឱ្យប្រព័ន្ធស៊ាំមានភាពសកម្ម។ ហើយនេះ ក៏អនុវត្តចំពោះទម្លាប់ច្នៃប្រឌិតផ្សេងទៀតផងដែរដែលនាំឱ្យរាងកាយអ្នកសកម្ម និងសកម្មភាពផ្សេងៗ។
៥.ជម្រុញសមត្ថភាពខួរក្បាល
ការបង្កើតទម្លាប់ច្នៃប្រឌិត ធ្វើឱ្យខួរក្បាលទាំងសងខាង(ផ្នែកខាងឆ្វេង និងស្តាំ)មានទំនាក់ទំនងគ្នាល្អ ពោលគឺប្រើប្រាស់ដូចជាការហ្វឹកហាត់ ឬធ្វើលំហាត់ប្រាណពង្រឹងសាច់ដុំ នេះបើតាមការលើកឡើងរបស់អ្នកវិទ្យាសាស្រ្ត។ ការអនុវត្តច្នៃប្រឌិតជាប្រចាំ នោះសមត្ថភាពថ្មីៗដែលចេញពីថាមពលខួរក្បាល នឹងកាន់ប្រសើរពីមួយថ្ងៃ ទៅមួយថ្ងៃហើយអ្នកនឹងឃើញពីប្រសិទ្ធិភាពនោះ៕
