ពេលវេលាដើរទៅមុខជានិច្ច ឥតមានចាំយើងឡើយ ហើយនេះជាដំណើរធម្មជាតិមិនអាចតវ៉ាបាន។ តែយ៉ាងណាមិញ យើងក៏អាចកំណត់ពេលវេលាដែលមាន សម្រាប់គោលដៅជីវិតរបស់យើង ស្របទៅតាមអត្ថន័យនៃជីវិតដែលស្រមៃចង់បាន។ តើ៣ឆ្នាំ ៥ឆ្នាំឬ១០ឆ្នាំខាងមុខទៀត អ្នកចង់ក្លាយជាអ្វី ចង់សម្រេចសមិទ្ធផលអ្វីដែលអ្នកស្រលាញ់? ដើម្បីជាជំនួយដល់ការកំណត់ចេញក្តីសុបិន្ត និងសម្រេចបាននូវទិសដៅទាំងនោះ បទពិសោធអ្នកឆ្លងកាត់មុនៗបានចែករំលែកជាចំណុចធំៗ ដូចខាងក្រោម៖
១.មានពេលវាយតម្លៃ និងឆ្លុះបញ្ជាំងពីខ្លួនឯង
ម្នាក់ៗមានក្តីស្រមៃផ្ទាល់ខ្លួន ហើយអ្វីដែលជួយយើងបានកំណត់ក្តីស្រមៃបានច្បាស់នោះ គឺការយល់ និងស្គាល់ពីខ្លួនឯង។ ឧទាហរណ៍នាពេលបច្ចុប្បន្ន តើអ្នកមានអ្វីខ្លះជាសមត្ថភាពដែលអាចធ្វើបាន? តើអ្នកមានចំណូលចិត្តខាងអ្វី? នរណា ជាបុគ្គលនិមិត្តរូបរបស់អ្នក? ដូចនេះការស្គាល់ពីខ្លួនឯង ជាដើមទុនមួយជួយត្រួសត្រាយផ្លូវទៅរកអ្វីដែលអ្នកចង់បានពិតប្រាកដសម្រាប់ជីវិត។
២.កំណត់គោលដៅដែលអ្នកស្រលាញ់អាចធ្វើបាន ហើយត្រូវតែច្បាស់លាស់
គោលដៅមិនច្បាស់ច្រើនពេក ឬទូលំទូលាយមិនអាចឱ្យអ្នកសម្រេចបានអ្វីមួយពិតប្រាកដនោះឡើយ។គួរពិចារណាជ្រើសយកនូវអ្វីជារឿងសំខាន់ដែលអ្នកចង់ធ្វើ ជាភាពជោគជ័យដែលកំណត់និយមន័យពីខ្លួនអ្នកផ្ទាល់ ព្រមទាំងឱ្យតម្លៃវាដោយក្តីស្រលាញ់ ហើយអាចប៉ាន់ស្មានបានពីពេលវេលាដែលនឹងសម្រេចបានពេលខាងមុខ ព្រមទាំងអ្វីដែលត្រូវការបន្ថែមដើម្បីដើរដល់គោលដៅនោះ។ នេះមានន័យថា គោលដៅច្បាស់ និងសមរម្យតាមពេលវេលា នឹងធ្វើឱ្យអ្នកដឹងថាត្រូវដើរទៅផ្លូវណា ត្រូវត្រៀមអ្វីទៅដល់ទីនោះដោយមិនខាតពេលវេលា។ ម្យ៉ាងទៀត ការជ្រើសយកគោលដៅដែលអ្នកស្រលាញ់ នឹងមិនងាយធ្វើឱ្យអ្នកមានអារម្មណ៍ថាហត់នឿយ នឹងធ្វើដើម្បីវាឡើយ។
៣.ចាប់ផ្តើមធ្វើ
ពិតណាស់ដឹងច្បាស់ថាត្រូវធ្វើអ្វី អ្នកក៏គួរចាប់ផ្តើមធ្វើវាឡើងទើបក្តីស្រមៃនោះទៅជាការពិតបាន។ អ្នកគួរចាំថា ការព្យាយាមក្តីសង្ឃឹម ការអំណត់ខ្លះជាអ្នករួមដំណើរដ៏ល្អ ដែលជួយអ្នកជម្នះឧបសគ្គនៅតាមផ្លូវទៅរកគោលដៅដែលយើងប្រាថ្នានោះ។ សកម្មភាពប្រចាំថ្ងៃប្រៀបដូចជាដុំឥដ្ឋមួយដុំ តែនៅពេលដុំឥដ្ឋនោះត្រូវសង់ផ្គុំគ្នាមួយថ្ងៃៗ នឹងលេចរូបរាងក្លាយជាសំណង់អគារ ទៅតាមប្លង់ ឬផែនទីដែលបានកំណត់ទុក។
៤.ឱ្យរង្វាន់ដល់ខ្លួនអ្នកខ្លះ
តាមផ្លូវទៅគោលដៅប្រាកដជាជួបរឿងលំបាកខ្លះ ឧបសគ្គខ្លះ ដែលជាវិញ្ញាសាត្រូវជួបដោះស្រាយ ប៉ុន្តែអ្នកត្រូវជឿជាក់លើខ្លួនឯងថា ឧបសគ្គទាំងនោះជាមេរៀនបង្រៀនឱ្យអ្នករឹងមាំ និងស្វែងរកវិធីប្រសើរជាងមុនដើម្បីទៅរកទិសដៅ និងក្តីស្រមៃដែលយើងចង់បាន។ ជាមួយគ្នានោះការចេះលើកទឹកចិត្តឱ្យខ្លួនឯងដូចជាការឱ្យរង្វាន់ដល់ខ្លួនឯង ការចំណាយសម្រាប់ធ្វើអ្វីដែលអ្នកចូលចិត្តម្តង ក៏គួរតែមានបន្ទាប់ពីសម្រេចបានជំហានមួយៗ។ នេះព្រោះថា អ្នកជាបុគ្គលសំខាន់ដើម្បីក្តីសុបិន្តអ្នកក្លាយជាការពិត ហើយការលើកទឹកចិត្ត និងស្រលាញ់ខ្លួនឯង ជាការជម្រុញឱ្យយើងបន្តខំប្រឹងប្រែងទៅរកគោលដៅ ដែលបានដៅទុក៕
