សូមចុចទីនេះដើម្បីទាញយកកម្មវិធី ក្រមា ប៉ុស្ដិ៍ ដាក់ក្នុងទូរស័ព្ទដៃការប្រើម៉ាស៊ីនត្រជាក់នៅពេលបច្ចុប្បន្នគឺជារឿងធម្មតាទៅហើយ ព្រោះតែអាកាសធាតុចេះតែក្ដៅឡើងៗឥតឈប់ឈរ។ ប៉ុន្តែការចំណាយលើថ្លៃភ្លើងសម្រាប់ផ្ទះដែលមានម៉ាស៊ីនត្រជាក់ និងគ្រឿងអេឡិចត្រូនិកផ្សេងទៀត ម្ចាស់ផ្ទះច្រើនណាស់ដែលចេះតែរអ៊ូរឿងចំណាយអស់ច្រើន។ ដូច្នេះដើម្បីកាត់បន្ថយថ្លៃចំណាយ និងដឹងពីវិធីប្រើម៉ាស៊ីនត្រជាក់កុំឱ្យស៊ីភ្លើងខ្លាំង និងមានផលល្អចំពោះសុខភាពផងនោះ អត្ថបទមួយនេះអាចជួយអ្នកបាន។
១. កុំដំឡើងកន្ទុយម៉ាស៊ីនត្រជាក់ដែលដាក់នៅខាងក្រៅត្រង់កន្លែងក្ដៅខ្លាំង៖
អ្នកជំនាញផ្នែកម៉ាស៊ីនត្រជាក់បានណែនាំមិនឱ្យដំឡើងកន្ទុយម៉ាស៊ីនត្រជាក់ដែលត្រូវដាក់នៅខាងក្រៅផ្ទះចំកន្លែងដែលមានកម្ដៅក្ដៅខ្លាំង ហើយត្រូវដំឡើងវាគម្លាតយ៉ាងហោចណាស់១៥ស.មឃ្លាតពីជញ្ជាំង ដើម្បីឱ្យខ្យល់ក្ដៅភាយចេញបានលឿន។ កាលណាដាក់កន្ទុយម៉ាស៊ីនត្រជាក់នៅកន្លែងម្លប់ ឬមានយ៉ាបពីលើអាចជួយឱ្យម៉ាស៊ីនត្រជាក់របស់អ្នកប្រើបានយូរ និងជួយសន្សំសំចៃថ្លៃភ្លើងបានទៀតផង។
២. ត្រូវបើកមុខងារ Power Saving ពេលប្រើម៉ាស៊ីនត្រជាក់៖
ម៉ាស៊ីនត្រជាក់ភាគច្រើនសម័យនេះសុទ្ធតែមានមុខងារសន្សំសំចៃថាមពល(Econavi mode) ដើម្បីជួយកាត់បន្ថយការស៊ីភ្លើង។ ដូច្នេះត្រូវប្រាកដថាអ្នកបានបើកមុខងារនេះឱ្យដំណើរកា ររាល់ពេលប្រើប្រាស់ម៉ាស៊ីនត្រជាក់ ព្រោះវាជួយគ្រប់គ្រងសីតុណ្ហភាពក្នុងបន្ទប់ដោយស្វ័យប្រវត្តិ និងសន្សំសំចៃបានយ៉ាងមានប្រសិទ្ធភាព។
៣. បិទបើកម៉ាស៊ីនត្រជាក់ឱ្យដឹងពេលវេលា៖
អ្នកជំនាញបានប្រាប់គន្លឹះបន្ថែមទៀតថា ដើម្បីសន្សំសំចៃភ្លើងអ្នកត្រូវតែដឹងពីការបិទ និងបើកម៉ាស៊ីនត្រជាក់ឱ្យបានត្រឹមត្រូវ។ ឧទាហរណ៍ ប្រសិនបើអ្នកបើកម៉ាស៊ីនត្រជាក់សុខៗ ហើយត្រូវចេញទៅក្រៅត្រឹមតែ២០ទៅ៣០នាទី អ្នកមិនចាំបាច់ចុចបិទឡើយ ព្រោះបើអ្នកចុចបិទ វាមិនត្រឹមតែមិនអាចជួយសន្សំសំចៃថាមពលភ្លើងប៉ុណ្ណោះទេ ថែមទាំងឱ្យវាស៊ីភ្លើងកាន់តែច្រើនទៅវិញ។ ហេតុផលគឺនៅពេលដែលម៉ាស៊ីនត្រជាក់ចាប់ដំណើរការដំបូង (ពេលបើកភ្លាម) វានឹងត្រូវការថាមពលភ្លើងខ្លាំង ដើម្បីឱ្យដំណើរការគ្រប់កម្លាំង ធ្វើឱ្យសីតុណ្ហភាពត្រជាក់។
៤. កំណត់សីតុណ្ហភាពត្រឹម២៥-២៦អង្សាបានហើយ៖
ជាធម្មតា សីតុណ្ហភាពត្រឹម២៥-២៦អង្សាគឺជាកម្រិតដ៏ល្អសម្រាប់រាងកាយមនុស្ស វាធ្វើឱ្យបន្ទប់ទាំងមូលត្រជាក់ល្មមក៏មិនក្ដៅពេក ដែលមិនប៉ះពាល់សុខភាពឬស៊ីភ្លើងខ្លាំង។ ដូចបានរៀបរាប់ខាងលើ ការបើកឱ្យសីតុណ្ហភាពត្រជាក់ពេកនឹងធ្វើឱ្យម៉ាស៊ីនត្រជាក់ត្រូវការថាមពលខ្លាំង ដើម្បីរត់ឱ្យពេញកម្លាំង ហើយទោះបីបើកមុខងារសន្សំសំចៃភ្លើងក៏មិនអាចជួយបានច្រើនដែរ។
៥. ត្រូវសម្អាតម៉ាស៊ីនត្រជាក់ឱ្យបានញឹកញាប់៖
កុំភ្លេចសម្អាតម៉ាស៊ីនត្រជាក់ឱ្យបានញឹកញាប់ និងទៀងទាត់ ដើម្បីកាត់បន្ថយការស៊ីភ្លើង និងធ្វើឱ្យម៉ាស៊ីនត្រជាក់រត់បានស្រួល មិនប្រឹងខ្លាំង ដោយសារតែស្ទះព្រោះធូលីដី ឬកម្ទេចកំទីតូចៗជាដើម។ ជាការណែនាំរបស់អ្នកជំនាញ ដើម្បីឱ្យម៉ាស៊ីនត្រជាក់នៅតែមានគុណភាពល្អ និងកាត់បន្ថយចំណាយ អ្នកគួរតែលាងសម្អាតវាចេញនៅរាល់ពេលប្រើពី៣ទៅ៤ខែម្ដង៕
