ទីក្រុងកៀវ៖ របាយការណ៍ នៃការវាយតម្លៃអំពីការអភិវឌ្ឍ របស់ធនាគារពិភពលោក កាលពីថ្ងៃពុធ បានបង្ហាញថា ប្រទេសអ៊ុយក្រែន ត្រូវការយ៉ាងហោចណាស់ ៥០ឆ្នាំ ដើម្បីឈានដល់ផលិតផលក្នុងស្រុកសរុប របស់ប្រទេសប៉ូឡូញ និងត្រូវការពេល ១០០ឆ្នាំដើម្បីទាន់ប្រទេសអាឡឺម៉ង់។
កាលពីខែមុន ធនាគារពិភពលោក បានព្យាករ ចំពោះកំណើនសេដ្ឋកិច្ចរបស់អ៊ុយក្រែននៅឆ្នាំ២០១៩ ថា ថយចុះពី ៣,៥%មក ២,៩% ប៉ុន្តែវាអាចកើនវិញបន្តិចឡើងដល់ ៣,៤% ក្នុងឆ្នាំ ២០២០ ។
លោក មូល័រ (Cyril Muller) អនុប្រធានធនាគារពិភពលោក ប្រចាំនៅតំបន់អឺរ៉ុបនិងអាស៊ីកណ្តាល បាននិយាយថា អ៊ុយក្រែនគឺត្រូវការធ្វើកំណែទម្រង់ចាំបាច់ ហើយប្រសិនបើបរាជ័យក្នុងការអនុម័ត នឹងធ្វើឲ្យមានអត្រាកំណើនតិចតួច។
គួរបញ្ជាក់ដែរថា កាលពីឆ្នាំ ២០១៨ ធនាគារពិភពលោក បានសង្កត់ធ្ងន់ថា អំពើពុករលួយគឺជាកត្តាសំខាន់មួយដែលធ្វើឱ្យការអភិវឌ្ឍរបស់ប្រទេសនេះថយជិត ២% ជារៀងរាល់ឆ្នាំ ហើយក្នុងឆ្នាំ ២០១៨ ប្រទេសអ៊ុយក្រែន មានផលិតផលក្នុងស្រុកសរុបក្នុងមនុស្សម្នាក់ ចំនួន ២, ៩៦៤ដុល្លារ៕
រូបប្រធានាធិបតី អ៊ុយក្រែន លោក Petro Poroshenko
