ការយល់ដឹងអំពី​យន្តការនានា នៃរបៀបគ្រប់គ្រងអាជីវកម្មរបស់អ្នក គឺជាគន្លឹះ​មួយដ៏សំខាន់ក្នុងការ​បង្កើតកិច្ចព្រមព្រៀងក្រុមហ៊ុនសហកម្មសិទ្ធិ និងរៀបចំឯកសារអំពីលក្ខខណ្ឌ​នានា។ ខណៈពេលដែលបញ្ជីរាយ​នាមចំណុច ដែល​ត្រូវ​ពិចារណានៅក្នុងកិច្ចព្រមព្រៀងក្រុមហ៊ុន​សហកម្មសិទ្ធិមិនអាចកំណត់បានដោយក្រុមហ៊ុនសហកម្មសិទ្ធិនីមួយៗ មានលក្ខណៈខុសប្លែកពីគ្នា តែខាងក្រោមនេះជាចំណុចសំខាន់ៗទាំងដប់ដែលមានជាទូទៅ៖

១. តួនាទីរបស់ដៃគូក្នុងការចុះហត្ថលេខានិងការអនុញ្ញាត

យល់ដឹងយ៉ាងច្បាស់អំពីអ្វីដែលអ្នក​គ្រប់គ្រងឬបុគ្គលិកការិយាល័យនៃអាជីវកម្មមួយ ត្រូវបានអនុញ្ញាត ឲ្យមានតួនាទីនិងការឈរឈ្មោះជាតំណាងឲ្យក្រុមហ៊ុន។

២. តួនាទីនិងទំនួលខុសត្រូវរបស់ដៃគូនីមួយៗ

គួរតែមានការបរិយាយអំពីទំនួលខុសត្រូវនិងភារកិច្ច​របស់ដៃគូនីមួយៗ ដូច្នេះដៃគូនីមួយៗដឹងអំពីអ្វីដែលពួកគេរំពឹងចង់បានពីដៃគូផ្សេងទៀត។លើសពី​នេះទៀតគួរតែកំណត់ជាមុននូវផលវិបាកសម្រាប់ដៃគូដែលមិនបានបំពេញភារកិច្ចរបស់ពួកគេ។

៣. ការបញ្ចូលដើមទុន

តើដៃគូនីមួយៗបានដាក់ទុនពេលវេលាសាច់ប្រាក់ និងទ្រព្យសម្បត្តិចំនួន​ប៉ុន្មានចូលទៅក្នុងក្រុមហ៊ុនសហកម្មសិទ្ធិនោះ?នេះរួមបញ្ចូលទាំងការបណ្តាក់ទុនលើកដំបូង និង​ការបណ្តាក់ទុន​បន្ថែមដែលអាចមានការចាំបាច់ដើម្បីបន្តដំណើរការអាជីវកម្មនាពេលអនាគត។

៤. សិទ្ធិទទួលបានការបែងចែងប្រាក់ចំណេញ សំណង និងការខាតបង់

សិទ្ធិណាមួយរបស់ដៃគូ​ក្នុងការទទួលបានការបែងចែកសិទ្ធិអំណាចក្នុងការសម្រេចចិត្តឬសិទ្ធិអំណាចផ្សេងទៀត រួមបញ្ចូល​ទាំងការទទួលបានមកវិញនូវប្រាក់វិនិយោគណាមួយឬទាំងអស់របស់ពួកគេ ចាំបាច់ត្រូវបញ្ជាក់យ៉ាង​ច្បាស់និងយ៉ាងលម្អិតនៅក្នុងកិច្ចព្រមព្រៀងក្រុមហ៊ុនសហកម្មសិទ្ធិ។

៥. តម្រូវការការបោះឆ្នោតជាឯកច្ឆ័ន

តើព្រឹត្តិការណ៍ឬការសម្រេចចិត្តណាមួយដែលនឹងត្រូវការ​ការបោះឆ្នោតជាឯកច្ឆ័នរបស់ដៃគូអាជីវកម្ម? វាគឺជារឿងសំខាន់ដែលអ្នកនិងដៃគូអាជីវកម្មរបស់អ្នក​ធ្វើការសម្រេចចិត្តរួមគ្នាអំពីនីតិវិធីនានា ចាប់តាំងពីចំណុចចាប់ផ្តើមនៃអាជីវកម្ម។

៦. ការរំលាយឬយុទ្ធសាស្រ្តក្នុងការចាកចេញពីក្រុមហ៊ុនសហកម្មសិទ្ធិ

កិច្ចព្រមព្រៀងក្រុមហ៊ុន​សហកម្មសិទ្ធិគួររួមបញ្ចូល​ព្រឹត្តិការណ៍នានាដែលបន្ទាប់ពីការកើតឡើងនៃព្រឹត្តិការណ៍ទាំងនោះហើយក្រុមហ៊ុនសហកម្មសិទ្ធិនឹងត្រូវរំលាយ ឬការងាររបស់ពួកគេនឹងត្រូវបញ្ចប់។ វាអាចទៅរួច​ដែលគំនិត និងគំរូនៃអាជីវកម្មធ្វើឲ្យពួកគេមិនឆ្លើយតបទៅនឹងសំណួរនេះបាន ប៉ុន្តែ ឧទាហរណ៍៖ នៅក្នុងជំនួញ​ផ្នែកអចលនទ្រព្យ វាជារឿងសំខាន់ដែលអ្នកគួរមានផែនការនិងបង្កើតព្រឹត្តិការណ៍​ដែលអាចកើត​ឡើង ដែលនឹងធ្វើឲ្យមានការលក់អចលនទ្រព្យឬទិញភាគហ៊ុនរបស់ដៃគូ ប្រសិនបើ​ពួកគេមិនចង់​រង់ចាំរយៈពេលវែង។

៧. បញ្ញត្តិស្តីពីការទិញ-លក់ ឬកិច្ចព្រមព្រៀងទិញ-លក់ដាច់ដោយឡែកពីគ្នា

កិច្ចព្រមព្រៀងប្រភេទ​នេះលើកឡើងអំពីការប្រែប្រួលសំខាន់ៗនៅក្នុងការរៀបចំក្រុមហ៊ុនសហកម្មសិទ្ធិ។ឧទាហរណ៍៖ តើ​នឹង​មានអ្វីកើតឡើងប្រសិនបើ ដៃគូម្ខាងចាកពីក្រុមហ៊ុនសហកម្មសិទ្ធិ ដោយស្ម័គ្រចិត្តឬមិនស្ម័គ្រចិត្ត? តើភាគហ៊ុនទាំងអស់របស់ពួកគេ នឹងត្រូវបានទិញដោយរបៀបណា? តើមានអ្វីកើតឡើងប្រសិនបើអ្នក​ចង់លក់ផលប្រយោជន៍នៃភាពជាកម្មសិទ្ធិកររបស់អ្នក តើដៃគូអាជីវកម្មរបស់អ្នក គួរមានសិទ្ធិទិញវា​ដែរឬទេមុនពេលដែលអ្នកលក់វាទៅឲ្យភាគីទីបី? តើនឹងមានអ្វីកើតឡើងប្រសិនបើដៃគូអាជីវកម្មរបស់​អ្នកស្លាប់? ឬលែងលះ?ឬដាក់ពាក្យស្នើសុំក្ស័យធន? ឬចង់ចូលនិវត្តន៍?

៨. បញ្ញត្តិនៃការបណ្តេញចេញ

ពិចារណាអំពីបញ្ញត្តិនេះដោយប្រុងប្រយ័ត្ន ពីព្រោះវាគឺ​ជាអាវុធមុខ​ពីរ។ ផលប្រយោជន៍នៃបញ្ញត្តិនេះ គឺអ្នកអាចធ្វើឲ្យការបណ្តេញចេញនេះ មានលក្ខណៈជាផ្លូវការ​នៅពេលដែល​ដៃគូណាម្នាក់អាចត្រូវបានបង្ខំឲ្យចាកចេញពីអាជីវកម្ម។ ឧទាហរណ៍ អ្នក និងដៃគូរបស់​អ្នកអាច​ព្រមព្រៀងថា ប្រសិនបើដៃគូណាម្នាក់មិនបានបំពេញរាល់កាតព្វកិច្ចការងាររបស់ខ្លួនទេ នោះពួកគេ​អាចត្រូវបានបង្ខំឲ្យចាកចេញពីអាជីវកម្ម។ ប៉ុន្តែចូរប្រាកដអំពីភាពស័ក្តិសមក្នុងការបណ្តេញ​ចេញ​របស់អ្នកការធ្វើវិស្សមកាល រយៈពេលយូរ មិនបង្កើតជាប្រការ​នៃ​ការបណ្តេញ​ចេញឡើយ។

៩. បញ្ញត្តិនៃការមិនប្រកួតប្រជែង

ឧទាហរណ៍ អ្នកនិងដៃគូរអាជីវកម្មរបស់អ្នកអាចយល់ព្រមថាប្រសិនបើម្នាក់នៅក្នុងចំណោមដៃគូនានាចាកចេញពីអាជីវកម្មនេះ ពួកគេមិនអាចបើកអាជីវកម្មឬ​ធ្វើការ​ឲ្យអាជីវកម្ម ដែលមានលក្ខណៈប្រកួតប្រជែងនឹងអាជីវកម្មរបស់អ្នកនៅក្នុងគម្លាតចម្ងាយ និង​សម្រាប់​រយៈពេលច្បាស់លាស់ណាមួយឡើយ។

១០. បញ្ញត្តិផ្សេងៗទៀត

ឧទាហរណ៍មួយចំនួន រួមបញ្ចូលទាំងបញ្ញត្តិមួយ ដែលចែងអំពីថ្លៃមេធាវី​សម្រាប់ភាគីដែលមិនបានបំពានកិច្ចព្រមព្រៀង ប្រសិនបើពួកគេឈ្នះរឿងក្តីប្រការដែលចែងអំពីការ​សម្រុះសម្រួល ឬមជ្ឈត្តការចងកាតព្វកិច្ច ដូច្នេះអ្នកមិនចាំបាច់ឡើងតុលាការឡើយប្រសិនបើអ្នកមិន​ចង់ ឬទីកន្លែង ឬជម្រើសណាមួយនៃបញ្ញត្តិច្បាប់ នៅពេលដែលច្បាប់រដ្ឋត្រូវយកមកអនុវត្តនៅក្នុង​វិវាទនៃកិច្ចសន្យានោះនិងនៅពេលដែលវិវាទនោះមានការពាក់ព័ន្ធនឹងរឿងក្តីណាមួយ។

ចូរប្រាកដថាអ្នកបានអង្គុយចុះជាមួយដៃគូរបស់អ្នក ដើម្បីពិភាក្សាអំពីសេណារីយ៉ូនៃករណីដែលល្អ​បំផុតនិងអាក្រក់បំផុត។ មានមេធាវីដែលមានសមត្ថភាព និងមានភាពស្មោះត្រង់មកតំណាងឲ្យ​ក្រុមហ៊ុន ឬឲ្យដៃគូនីមួយៗជួលមេធាវីម្នាក់ មកត្រួតពិនិត្យឯកសារនៃក្រុមហ៊ុនសហកម្មសិទ្ធិឡើងវិញ និង​លើកឡើងអំពីបញ្ហានានាខាងលើ ព្រមទាំងតម្រូវការរៀងៗខ្លួននិងតម្រូវការជាក់លាក់ នៅក្នុង​ស្ថានភាពជាក់លាក់របស់អ្នក និងដៃគូរបស់អ្នក៕