មនុស្សគ្រប់គ្នា តែងតែនិយាយថា ពួកគេខិតខំប្រឹងប្រែងស្វែងរកទ្រព្យសម្បត្តិគឺដើម្បីកសាងសេចក្តីសុខ ហើយគេយល់ថាទាល់តែមានទ្រព្យច្រើនទើបមានសុភមង្គល។
ឆ្លើយតបជាមួយនឹងបញ្ហានេះ លោក ង៉ែត ជូ អ្នកជំនាញហិរញ្ញវត្ថុ បានលើកឡើងថា មនុស្សជាច្រើនយល់ច្រឡំថា ការមានទ្រព្យសម្បត្តិច្រើននិងចូលនិវត្តន៍ក្នុងវ័យក្មេង នឹងនាំឱ្យខ្លួនគេមានសេចក្តីសុខ តែផ្ទុយមកវិញវាមិនប្រាកដថាដូច្នេះនោះទេ។
លោកបានលើកអំណះអំណាងថា មហាសេដ្ឋី Warren Buffett ដែលជាអ្នកវិនិយោគ និងជាសាស្ត្រាចារ្យផងនោះ បានបញ្ជាក់ថា ការមានទ្រព្យសម្បត្តិច្រើនមិនធ្វើឱ្យមនុស្សមានសេចក្តីសុខនោះទេ។ លោកថាអ្វីដែលធ្វើឱ្យមនុស្សមានសេចក្តីសុខ គឺនៅពេលគេប្រើប្រាស់ធនធានដែលខ្លួនមាន ដើម្បីបំពេញកិច្ចការងារដែលខ្លួនចូលចិត្តទៅវិញទេ។
លោក ង៉ែត ជូ បានបញ្ជាក់ថា៖«មនុស្សជាច្រើនតែងតែប្រាថ្នាចង់បានសេរីភាពហិរញ្ញវត្ថុ ដើម្បីអាចចូលនិវវត្តន៍ក្នុងវ័យក្មេង។ សកម្មភាពនេះមិនធ្វើឱ្យពួកគេសប្បាយចិត្តដូចអ្វីដែលពួកគេគិតនោះទេ»។
អ្នកជំនាញហិរញ្ញវត្ថុខាងលើបានលើកឡើងផងដែរថា អ្នកជំនួញនិងជាអ្នកនយោបាយអាមេរិកលោក Kevin O’Lary បានបញ្ជាក់ផងដែរថា ការចូលនិវត្តន៍ក្នុងវ័យក្មេង មិនអាចធ្វើទៅរួចនោះទេ បើទោះបីជាពួកគេមានទ្រព្យសម្បត្តិច្រើនក៏ដោយ។ តាមរយៈបទពិសោធន៍របស់លោកផ្ទាល់ នៅពេលលោកអាយុ៣៦ឆ្នាំ លោកបានលក់ក្រុមហ៊ុនដែលលោកបានបង្កើតដំបូង បានប្រាក់រាប់លានដុល្លារអាមេរិក។ នៅពេលនោះលោកបានលាលែងពីការងារបានត្រឹមតែ ៣ឆ្នាំ ក៏មានអារម្មណ៍ថាអផ្សុកនិងថប់អារម្មណ៍ខ្លាំង។ ហេតុនេះហើយទើបធ្វើឱ្យលោកងាកទៅបង្កើតអាជីវកម្ម និងធ្វើការងារដែលលោកពេញចិត្តឡើងវិញ។ ជារួមអ្នកនយោបាយខាងលើយល់ឃើញថា ការធ្វើការងារគឺមិនមែនដើម្បីតែលុយមួយមុខគត់នោះទេ តែវាជាការរក្សាទំនាក់ទំនងសង្គម និងជាការជួយឱ្យខួរក្បាលមានកាន់តែល្អ ហើយមានអាយុវែង។
លោក ង៉ែត ជូ បានធ្វើសេចក្តីសន្និដ្ឋានថា ការខិតខំរកលុយដើម្បីមានលទ្ធភាព ធ្វើកិច្ចការងារដែលយើងពេញចិត្តជាចំណុចគន្លឹះយ៉ាងសំខាន់ដើម្បីកសាងសេចក្តីសុខរបស់មនុស្សម្នាក់ៗ។ លោកថា សេចក្តីសុខរបស់មនុស្សមិនស្ថិតតែលើការមានទ្រព្យសម្បត្តិមហាសាលដោយមិនធ្វើការងារនោះទេ៕