កោសិកាយើងវិវឌ្ឍទៅមុខជានិច្ច ហើយប្រែប្រួលពីមួយថ្ងៃទៅមួយថ្ងៃ រហូតដល់ភាពជ្រីវជ្រួញនៅពេលអាយុកាន់តែច្រើន។ ប៉ុន្តែបើយើងចេះរក្សាស្បែកបានល្អ នោះគឺអាចបន្ថយដំណើរការនៃការវិវឌ្ឍនោះបានខ្លះដែរ។ មានវិធីមួយចំនួនដែលអ្នកស្រាវជ្រាវសុខភាពបានលើកឡើងថា អាចពន្យាភាពចាស់ជ្រីវជ្រួញនៃស្បែករក្សាឱ្យនៅក្មេងជាងវ័យបានដោយតិចនិកខ្លះទាំងនេះ៖
១. តែបៃតង
ការទទួលទានតែបៃតងស្រស់ៗ មានជាគុណប្រយោជន៍សម្រាប់ស្បែក។ នេះគឺដោយសារតែវាមានផ្ទុកសារធាតុប្រឆាំងអុកស៊ីតកម្ម ដែលជម្រុញការដុតរំលាយអាហារក្នុងរាងកាយ ជួយឱ្យសុខភាពពីខាងក្នុងខ្លួនល្អ ដែលធ្វើឱ្យយើងនៅក្មេងជាងវ័យ។
២.ជៀសវាងការត្រូវពន្លឺថ្ងៃច្រើនជ្រុល
ពន្លឺថ្ងៃ ជួយផ្តល់វីតាមីនD ដែលល្អសម្រាប់ស្បែក ក៏ប៉ុន្តែ ការត្រូវពន្លឺថ្ងៃខ្លាំងនិងច្រើនពេក គឺធ្វើឱ្យស្បែកខូចជ្រីវជ្រួញទៅវិញ ជាពិសេសកាំរស្មី UVព្រះអាទិត្យ។ យើងអាចប្រើឡេការពារកម្តៅថ្ងៃឬពាក់អាវវែងជិតៗ ដើម្បីការពារខ្លួន ធ្វើបែបនេះ គឺអាចបង្ការស្បែកពីភាពជ្រីវជ្រួញបានខ្លះដែរ។
៣.ជៀសវាងអាហារ ឬភេសជ្ជៈមានដាក់ស្ករសច្រើន
គ្នាយើង មានដឹងទេថាចំណីអាហារដែលប្រើស្ករស ច្រើនគឺប្រៀបដូចពន្លឿនភាពចាស់នៃស្បែក ដោយហេតុថា ស្ករសបម្លែងជាតិប្រូតេអ៊ីនក្នុងខ្លួននឹងធ្វើឱ្យស្បែកឆាប់ចាស់។ បើយើង ជាអ្នកចូលចិត្តផ្អែមគឺអាចជំនួសវិញដោយជម្រើសផ្លែឈើ ដែលជាការល្អប្រសើរសម្រាប់ស្បែក។
៤.ការញ៉ាំខ្លាញ់ត្រី
ខ្លាញ់ត្រីជាប្រភពនៃជាតិអូមេហ្គា ៣ ដែលជំនួយទៅដល់ស្បែកឱ្យនៅក្មេងជាងវ័យ។ អ្នកអាចញ៉ាំវាផ្ទាល់ ឬក្នុងទម្រង់ជាថ្នាំគ្រាប់ក៏បានដែលវាជួយរក្សាស្បែកឱ្យនៅស្អាត។
៥.ការប្រើប្រេងល្ង
ប្រេងល្ងមិនត្រឹមតែជួយផ្តល់សំណើមទៅដល់ស្បែកប៉ុណ្ណោះទេតែថែមទាំងធ្វើឱ្យស្បែកភ្លឺថ្លា និងពន្យារភាពជ្រីវជ្រួញបានទៀត។យកប្រេងល្ង មកម៉ាស្សាថ្នមៗ ទៅលើស្បែកជារៀងរាល់ព្រឹកបន្ទាប់មកងូតទឹកសម្អាតចេញ ដូចនេះវាជួយជម្រុះកោសិកាស្បែកងាប់ធ្វើឱ្យស្បែកយើងនៅតែស្អាត។
៦.បំបាត់ស្រ្តេស
ស្រ្តេសជាចំណែកមួយដែលធ្វើឱ្យស្បែកយើងចាស់ជ្រីវជ្រួញជាងអាយុ ហើយវាក៏បង្កជាបញ្ហាដល់សុខភាពដែរ។ យើងនៅតែអាចកាត់បន្ថយស្រ្តេសបានដូចជាការបញ្ចេញសកម្មភាពសកម្ម ដូចជា ការហាត់ប្រាណ ការដើរលំហែកម្សាន្តឬដោយតិចនិកមួយចំនួនទៀតដែលជួយឱ្យយើងគេចចេញពីការស្រ្តេស៕