បន្ទាប់ពីរាជរដ្ឋាភិបាល ដែលមានសម្ដេចតេជោ ហ៊ុន សែន ជានាយករដ្ឋមន្រ្តី បានដាក់លិខិតស្នើសុំការផ្ដល់សេចក្ដីទុកចិត្ត ពីរដ្ឋសភា កាលពីថ្ងៃទីមីនា ឆ្នាំ ២០២០កន្លងទៅ ក្នុងថ្ងៃនេះផងដែរ(៣០មីនា) រដ្ឋសភាក៏បានបោះឆ្នោតជាកញ្ចប់ ដើម្បីគាំទ្រ ការតែងតាំង និងកែសម្រួល សមាសភាពរាជរដ្ឋាភិបាលបន្ថែមថ្មី និងត្រូវបានព្រះមហាក្សត្រ ចេញព្រះរាជក្រឹត្យ ក្នុងថ្ងៃតែមួយផងដែរ។
រដ្ឋមន្រ្តីថ្មី៤រូប មាន៖
- ឯកឧត្តម កើត រិទ្ធ អតីតជារដ្ឋលេខាធិការ ក្រសួងយុត្តិធម៌ តែងតាំងជា រដ្ឋមន្រ្តីក្រសួងយុត្តិធម៌
- ឯកឧត្តមបណ្ឌិត ជា វ៉ាន់ដេត អតីតជាសមាជិករដ្ឋសភា តែងតាំងជា រដ្ឋមន្រ្តីក្រសួងប្រៃសណីយ៍និងទូរគមនាគមន៍
- ឯកឧត្តម ឈិត សុខុន អតីតជារដ្ឋលេខាធិការ ទីស្ដីការគណៈរដ្ឋមន្រ្តី តែងតាំងជា រដ្ឋមន្រ្តីក្រសួង ធម្មការនិងសាសនា
- ឯកឧត្តមព្រុំ សុខា អតីតជារដ្ឋលេខាធិការ ក្រសួងមហាផ្ទៃ តែងតាំងជា រដ្ឋមន្រ្តីក្រសួងមុខងារសាធារណៈ។
ដោយឡែក ឯកឧត្តម ចម ប្រសិទ្ធិ ត្រូវតែងតាំងជា ទេសរដ្ឋមន្រ្តី រដ្ឋមន្រ្តី ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ដែលបានដូរឈ្មោះពី ក្រសួងឧស្សាហកម្មនិងសិប្បកម្ម)។
ការរុះរើបន្ថែមសមាសភាពគណៈរដ្ឋមន្រ្តីនេះ ក៏ត្រូវបានសម្ដេចហ៊ុនសែន លើកហេតុផលដែរថា ដោយរដ្ឋមន្រ្តីខ្លះមានវ័យចាស់ និងខ្លះក៏មានបញ្ហាសុខភាព។
គួរបញ្ជាក់ដែរថា នេះជាការរុះរើគណៈរដ្ឋមន្រ្តីលើកទី១ បន្ទាប់ពីការបោះឆ្នោតជាសកលកាលពីឆ្នាំ ២០១៨ កន្លងទៅ៕