តើអ្នកធ្លាប់ឆ្ងល់ទេថាហេតុអ្វីរាងកាយអ្នកហាក់បាត់បង់ជីវជាតិចិញ្ចឹម ទោះបីអ្នកទទួលទានអាហារគ្រប់គ្រាន់ក៏ដោយនោះ? ប្រសិនបើអ្នកសង្កេតឃើញអ្នកណាម្នាក់ដែលឧស្សាហ៍អស់កម្លាំងស្បែកស្លេកស្លាំង និងមើលទៅមិនមានសុខភាពល្អគឺអាចមកពីពួកគេធ្វើរឿងទាំងនេះក្រោយពេលបាយរួចភ្លាម។
១. ញ៉ាំផ្លែឈើភ្លាម ក្រោយបាយ៖
យោងតាមអ្នកជំនាញអាហារូបត្ថម្ភជនជាតិឥណ្ឌាអ្នកនាង ManishaChopra បានប្រាប់ថា ផ្លែឈើស្រស់គឺជាប្រភពអាហារដ៏ល្អ។ ប៉ុន្តែប្រសិនបើយើងញ៉ាំវាភ្លាមៗ បន្ទាប់ពីទទួលទានអាហាររួចភ្លាមដែរនោះ ផ្លែឈើទាំងនោះនឹងត្រូវលាយជាមួយអាហារដែលអ្នកទើបតែទទួលទានមុននេះ ហើយកំណត់សមត្ថភាពបឺតស្រូបសារធាតុចិញ្ចឹមចូលទៅក្នុងរាងកាយ។ ប្រការនេះអាចបណ្តាលឱ្យមានបញ្ហាប្រព័ន្ធរំលាយអាហារ និងធ្វើឱ្យផ្លាស់ប្តូរតម្លៃអាហារូបត្ថម្ភនៃអាហារដែលអ្នកបានញ៉ាំ។
២.ជក់បារី៖
ដូចដឹងស្រាប់ហើយ ការជក់បារីគឺជាទម្លាប់មិនល្អចំពោះសុខភាពទាល់តែសោះ ប៉ុន្តែវានឹងកាន់តែគ្រោះថ្នាក់និងអាក្រក់ខ្លាំងគុណនឹង១០ដង ប្រសិនបើអ្នកដុតបារីជក់ភ្លាមក្រោយពេលបាយរួចមិនថាពេលណាឡើយ។ ថ្នាំជក់មានសារជាតិបង្កមហារីកដែលអាចធ្វើឱ្យកើតជំងឺពោះវៀនរ៉ាំរ៉ៃ និងធ្ងន់ធ្ងររហូតឈានដល់មហារីកពោះវៀនធំនៅពេលក្រោយទៀតផង។
មិនតែប៉ុណ្ណោះ ការជក់បារីក្រោយពេលទើបញ៉ាំអាហារឆ្អែត ជាលិកាសួតនឹងបង្កើនការបឺតស្រូបផ្សែងចេញពីបារីដែលបង្កឱ្យសារធាតុប៉ះពាល់សុខភាពជាច្រើន ដូចជាជាតិនីកូទីនស្រូបចូលទៅក្នុងខ្លួនបានកាន់តែច្រើន។
៣.បាយរួចភ្លាមគេងភ្លាម៖
ប្រសិនបើអ្នកទម្លាប់ទម្រេតខ្លួនដេកភ្លាម ក្រោយពេលបាយរួច អ្នកគួរតែផ្លាស់ប្ដូរទម្លាប់នេះចេញភ្លាម។ ជាទូទៅនៅពេលដែលអ្នកគេងភ្លាមៗ បន្ទាប់ពីញ៉ាំអាហាររួច ទឹកសម្រាប់រំលាយអាហារដែលបញ្ចេញដោយក្រពះនឹងហៀរចេញមក ហើយបណ្តាលឱ្យក្រហាយទ្រូងឈឺក្រពះ។ ដំណើរការរំលាយអាហារទាំងមូលក៏ត្រូវបានប៉ះពាល់ដោយហេតុនេះ។
ដូច្នេះបន្ទាប់ពីញ៉ាំអាហាររួច អ្នកគួរតែសម្រាកយ៉ាងតិច៣០នាទី ទុកឲ្យអាហារនៅក្នុងក្រពះត្រូវបានរំលាយឱ្យបានស្រួលបួល ហើយបន្ទាប់មកទើបអ្នកអាចគេងលក់ស្កប់ស្កល់។
៤.រត់លោត ឬហាត់ប្រាណដោយប្រើកម្លាំង
ការធ្វើលំហាត់ប្រាណភ្លាមៗ បន្ទាប់ពីទទួលទានអាហាររួចអាចរំខានដល់ដំណើរការរំលាយអាហារ។ អ្នកអាចនឹងមានអាការៈដូចជាចង់ក្អួតចង្អោរ ឈឺពោះ ឬវិលមុខជាដើម។
៥.ងូតទឹក៖
ការងូតទឹកភ្លាមក្រោយពេលបាយរួច នឹងធ្វើឱ្យចលនាឈាមរត់មិនស្រួល ដែលឈាមត្រូវរត់យ៉ាងលឿនទៅស្បែកដើម្បីគ្រប់គ្រងសីតុណ្ហភាពក្នុងរាងកាយ។ ការធ្វើបែបនេះនឹងបណ្ដាលឱ្យមានបញ្ហាប្រព័ន្ធរំលាយអាហារ ព្រោះដំណើរការរំលាយអាហារត្រូវការថាមពលកាន់តែខ្លាំងដើម្បីធ្វើការ៕