ប្រទេសជប៉ុន ឈរលេខរៀងទី១ នៃការវិនិយោគច្រើនបំផុត ក្នុងប្រទេសវៀតណាម ឆ្នាំ២០១៨

(វៀតណាម)៖ ស្ថិតិនៃការវិនិយោគ ក្នុងប្រទេសវៀតណាម បានបង្ហាញថា មានប្រទេសចំនួនជាង 100 ប្រទេស បានបណ្ដាក់ទុនវិនិយោគ នៅវៀតណាម ចាប់ពីខែមករាដល់ខែធ្នូ ឆ្នាំ២០១៨នេះ។ ក្នុងចំណោមប្រទេសទាំងនោះ ប្រទេសជប៉ុនបាននាំមុខគេ ដោយមានទឹកប្រាក់វិនិយោគ 8,59 ពាន់លានដុល្លារ ដែលស្មើនឹង24 ភាគរយ នៃការវិនិយោគផ្ទាល់ពីបរទេស(FDI) សរុប។

រីឯ កូរ៉េខាងត្បូង ឈរនៅលំដាប់ទី២ ទឹកប្រាក់វិនិយោគ7,2 ពាន់លានដុល្លារ និងសឹង្ហបុរីឈរនៅលំដាប់ទី៣ ដែលមានទឹកប្រាក់វិនិយោគ 5 ពាន់លានដុល្លារ ដែលស្មើនឹង24,2% និង 14,2% នៃ FDI សរុប រៀងគ្នា ក្នុងប្រទេសវៀតណាម នេះបើតាមការចុះផ្សាយ របស់សារព័ត៌មានវៀតណាម។

ក្នុងទិន្នន័យនោះ វិស័យផលិតកម្មនិងកែច្នៃ បានទទួលការវិនិយោគ ច្រើនបំផុត ពីវិនិយោគិនបរទេស ក្នុងទឹកប្រាក់ 16,58 ពាន់លានដុល្លារ ឬស្មើនឹង 47 ភាគរយ នៃដើមទុនដែលបានចុះបញ្ជី។

វិស័យអចលនទ្រព្យ បានជាប់ចំណាត់ថ្នាក់លេខ 2ជាមួយនឹងទឹកប្រាក់ 6,6 ពាន់លានដុល្លារ ឬ 18,5 ភាគរយហើយវិស័យលក់រាយ ឈរនៅលំដាប់ទី 3 ដោយមានចំនួន 3,67 ពាន់លានដុល្លារឬ 10,3 ភាគរយ៕