បច្ចេកវិទ្យា៖ URL Shortener ឬការបង្រួម URLឲ្យខ្លី បានផ្ដល់ភាពងាយស្រួលនិងទទួលបានការពេញនិយមជាខ្លាំងសម្រាប់អ្នកផលិតមាតិកា អត្ថបទនិងវីដេអូផ្សេងៗ ដើម្បីចែករំលែកលើបណ្ដាញសង្គមថែមទាំងងាយស្រួលក្នុងការរក្សាទុក។
អ្វីទៅជា URL Shortener?
URL Shortener នេះ គឺជាវិធីបង្រួញនូវតំណភ្ជាប់របស់គេហទំព័រ(URLដើមពីវិបសាយ ដែលមានភ្ជាប់ Domain Name មកជាមួយ) ធ្លាប់មានទម្រង់វែងពិបាកក្នុងការរក្សាទុកឬថតចម្លងជាដើម ឲ្យវាប្រែក្លាយជាURLថ្មីមួយទៀតដែលមានទម្រង់ខ្លីបំផុត ដោយការប្រើប្រាស់នូវវិបសាយដែលមានមុខងារក្នុងការបង្រួមURLនេះ។ លទ្ធផលនៃការបង្រួមគឺនឹងអាចនាំអ្នកអានទៅរកមាតិកាតែ១ដូចគ្នា។
ឧទាហរណ៍៖
- URL ទម្រង់ដើម៖ http://kramapost.com/upload/media/posts/2021-07/20/telegram_1626779099-s.jpg
- ទម្រង់ខ្លីក្រោយបំព្រួញហើយ https://bit.ly/3f1dJnJ មានន័យថា អ្នកផលិតមាតិកាបានបម្រួញដោយប្រើវិបសាយbit.ly ។
ការប្រឈមសម្រាប់អ្នកប្រើប្រាស់
ពេលដែលមាតិកាត្រូវបានចែករំលែកអ្នកប្រើប្រាស់ជាទូទៅនឹងមិនអាចដឹងបានទេថា មាតិកានោះចេញមកពីប្រភពណាមួយឲ្យពិតប្រាកដនោះទេ ដោយសារតែវាត្រូវបានបង្រួមឲ្យខ្លីរួចទៅហើយជាមួយវិបសាយថ្មី ដែលពេលខ្លះមានភ្ជាប់ជាមួយផ្ទាំងរូបភាពមុខ( Thumbnail) ដែលទាក់ទាញអ្នកអានឲ្យចុចទៀតផង។
នេះជាឱកាសសម្រាប់អ្នកវាយប្រហារតាមបណ្ដាញអ៊ិនធឺណិត ដែលមានចេតនាមិនល្អ ដើម្បីអាចបង្កប់នូវកម្មវិធីមេរោគឬបង្ហាញរូបភាពអាសអាភាស ឬជម្រុញឲ្យអ្នកប្រើប្រាស់ដំឡើងកម្មវិធីថ្មីក្នុងទូរស័ព្ទឬកុំព្យូទ័ររបស់អ្នកទៀតផង ។
ការប្រុងប្រយ័ត្ន
ដើម្បីជាសុវត្ថិភាព លោកអ្នកត្រូវប្រយ័ត្ននិងមិនត្រូវចុចមើលមាតិកាណាដែលមិនមានប្រភពច្បាស់លាស់នោះទេ។ ហើយបើសិនអ្នកអាចឃើញពី URLខ្លីនោះមានភ្ជាប់ឈ្មោះវិបសាយបង្រួញដែលគេនិយមប្រើ មានន័យថា វាគឺជាមាតិកាដែលអាចទុកចិត្តបាន៕