សូមចូល Telegram ក្រមាប៉ុស្ដិ៍ ទទួលបានអត្ថបទឆាប់រហ័ស
ចំណុចខ្លះៗដែលជាកំហុស ប៉ុន្តែគឺជាមេរៀនដែលអ្នកអាចគិតពិចារណាសម្រាប់ការកែប្រែសម្រាប់ការប្រើប្រាស់ពេលវេលា និងសម្រាប់ការអភិវឌ្ឍខ្លួនឱ្យបានជាប្រយោជន៍។ ចំណុចខ្លះៗ ដែលជាបញ្ហាដែលយុវជនច្រើន អាចមើលរំលងក៏អាចមើលសម្រាប់ជាការពញ្ញាក់ស្មារតី ដើម្បីកុំឱ្យចំណាយពេលខ្ជះខ្ជាយទៅលើរឿងដែលមិនបានបង្កជាប្រយោជន៍។ ចំណុចទាំងនោះត្រូវបានលើកឡើងជារួមក្នុងសង្គមមានដូចជា៖
១.មិនរៀនយកចិត្តទុកដាក់
មិនយកចិត្តទុកដាក់ត្រង់ចំណុចនេះគឺសម្តៅតាំងពីសកម្មភាពតូចៗប្រចាំថ្ងៃ។ បើអ្នកនៅជាយុវវ័យក៏គួរយកចិត្តទុកដាក់រៀនពីសកម្មភាពដែលអាចរស់នៅប្រចាំថ្ងៃរាប់តាំងពីជួយធ្វើកិច្ចការងារផ្ទះប៉ាម៉ាក់ ការខិតខំរៀនសូត្រយកជំនាញមួយប្រាកដសម្រាប់ខ្លួនឯង និងថែទាំសុខភាពពីអាយុក្មេងទៅ។ នេះក៏ព្រោះថាហេតុទាំងនោះនឹងនាំឱ្យអ្នកជួបរឿងបីនៅអនាគត គឺការរស់នៅដោយឯករាជ្យ (បើទោះម៉ាក់ប៉ាមិននៅ) អាចចិញ្ចឹមខ្លួនអ្នកបាន (មិនពឹងពាក់គេច្រើន) និងរីករាយដោយសុខមាលភាព (ដោយអ្នកមានសុខភាពរស់នៅល្អ)។
២.មិនអើពើនឹងបទពិសោធខ្លះទុកសម្រាប់ខ្លួន
ចំណេះដឹងពីសាលាពីឯកសារសិក្សាពិតជាបានត្រួសត្រាយបង្ហាញផ្លូវអ្នកមែន ប៉ុន្តែការរៀនសូត្រជាបទពិសោធគឺអ្នកអាចរៀនបន្ថែមពីគ្រប់ទីកន្លែង។ ជាឧទាហរណ៍ បទពិសោធខ្លះៗលើការធ្វើការងារសង្គមការចេញធ្វើរបរលក់ដូរជាអាជីវកម្មខ្នាតតូចការរៀនបំណិនជីវិត (ជួសជុលរបស់របរចម្អិនម្ហូប ការលេងកីឡា...ជាដើម)ការឆ្លៀតអនុវត្តការងារដែលពាក់ព័ន្ធនឹងជំនាញរៀននៅសាលាដែលសុទ្ធសឹងជាសញ្ញាឃើញ និងជាបទពិសោធជួយជម្រុញអ្នកឱ្យមានឱកាសច្រើនសម្រាប់ការវិវឌ្ឍខ្លួនទៅមុខ។
៣.ការអួតអាង
ចំណេះវិជ្ជានិងបទពិសោធជាអ្វីដែលគ្មានដែនកំណត់ ដូចនេះអ្នកមិនវាស់វែងថាបានចេះសព្វគ្រប់អស់ហើយនោះទេដែលចំណុចនេះ គឺចង់សម្តៅថាអ្នកនៅតែអាចរៀនសូត្របន្ថែមបានជារៀងរហូត។ ម្យ៉ាងទៀតការប្រើប្រាស់ទ្រព្យធនដែលអ្នកមានគួរប្រើប្រាស់វាឱ្យបានត្រឹមត្រូវជាជាងការបង្អួត ឬហ៊ឺហារក្នុងផ្លូវខុសឬមួយភ្លេចខ្លួនដែលធ្វើឱ្យរបស់ទ្រព្យអាចបាត់បង់ទៅវិញមិនគង់វង្ស។
៤.មិនផ្តើមរៀនទំនួលខុសត្រូវ
ពីយុវជនវ័យជំទង់ទៅជាពលរដ្ឋមួយរូបក្នុងសង្គមគឺតម្រូវឱ្យយើងជាយុវវ័យរៀនមានទំនួលខុសត្រូវពីសកម្មភាពតូចៗទៅ។ ឧទាហរណ៍តូចៗងាយយល់អ្នកអាចផ្តើមចេញពីការគោរពពេលវេលាគោរពច្បាប់ទម្លាប់ក្នុងសង្គមទទួលខុសត្រូវលើកិច្ចការខ្លួន ឬមួយចេះអធ្យាស្រ័យយោគយល់គ្នាក្នុងបរិស្ថានរស់នៅជាដើមដែលសុទ្ធសឹងនាំមកនូវតម្លៃប្រចាំខ្លួនអ្នករហូតដល់ពេលខាងមុខ និងជាអនាគតប្រជាពលរដ្ឋដ៏រឹងមាំនៅក្នុងសង្គម៕