មនុស្សគ្រប់គ្នា សុទ្ធតែកើតមកជាមួយនឹងសមត្ថភាពនិងទេពកោសល្យ ដែលធម្មជាតិបានផ្តល់ឱ្យរៀងៗខ្លួនតែអ្វីដែលធ្វើឱ្យមនុស្សម្នាក់ៗ មានលទ្ធផលខុសគ្នាគឺពួកគេមានស្ថានភាពនិងទំនុកចិត្តខុសគ្នាលើខ្លួនឯង។
ជាទូទៅ មនុស្សដែលមានទំនុកចិត្តលើខ្លួនឯងតែងតែជាមនុស្សដែលទទួលបានឱកាស និងប្រើប្រាស់សមត្ថភាពរបស់ខ្លួនបានយ៉ាងអស់លទ្ធភាព ខុសពីអ្នកដែលមិនមានទំនុកចិត្តលើខ្លួនឯង ដែលតែងតែរារែកនិងមិនហ៊ានសម្រេចចិត្តទោះបីជាឱកាសមកដល់ក៏ដោយ។
ដោយមើលឃើញពីមូលហេតុនេះ ហើយទើបថ្ងៃនេះក្រមា ប៉ុស្តិ៍ សូមលើកយកវិធីសាស្ត្រ២យ៉ាង ដែលអ្នកជំនាញនានាលើពិភពលោកណែនាំ ដើម្បីជំរុញឱ្យអ្នកទាំងអស់គ្នាអាចមានសមត្ថភាព ពង្រឹងទំនុកចិត្តលើខ្លួនឯងបានល្អ។
១. បន្ថយការប្រៀបធៀប
ជាទូទៅ មនុស្សម្នាក់ៗតែងតែមានចំណុចខ្លាំងនិងចំណុចខ្សោយរៀងៗខ្លួន តែជាទូទៅមនុស្សមួយចំនួនហាក់មិនបានគិតដល់ភាពធម្មតានៃស្ថានភាពទាំងអស់នោះទេ។ ក្នុងការរស់នៅជាក់ស្តែង មនុស្សជាច្រើនតែងតែធ្វើការប្រៀបធៀបពីខ្លួនឯងជាមួយអ្នកដទៃជំនួសឱ្យការខិតខំប្រឹងប្រែងស្គាល់ពីខ្លួនឯង។ ហេតុនេះហើយទើបធ្វើឱ្យគេខ្វះទំនុកចិត្តលើខ្លួនឯងហើយអង្គុយរង់ចាំមើលអ្នកដទៃទទួលបានសម្មិទ្ធផលល្អៗ និងអភិវឌ្ឍទៅវិញ។
ហេតុនេះជាដំណោះស្រាយ សូមកុំប្រៀបធៀបខ្លួនឯងជាមួយអ្នកដទៃ តែគួរចំណាយពេលស្វែងយល់ពីខ្លួនឯងដើម្បីអភិវឌ្ឍប្រកបដោយទំនុកចិត្ត។
២. រៀបចំផែនការអភិវឌ្ឍខ្លួនឯង
មនុស្សភ័យព្រួយនៅពេលពួកគេមិនត្រូវប្រឈមមុខជាមួយនឹងការងារ ឬការដោះស្រាយបញ្ហាដែលគេមិនចេះ និងមិនមានភាពច្បាស់លាស់។ ហេតុនេះការសិក្សារៀនសូត្រពីគ្រប់មជ្ឈដ្ឋាន ជាវិធីសាស្ត្រល្អបំផុតក្នុងការបំបាត់ភាពភ័យខ្លាចក្នុងការធ្វើអាជីវកម្មក៏ដូចជាការធ្វើការងារជាដើម។
ក្រោយពេលស្គាល់ខ្លួនឯងច្បាស់លាស់ហើយ អ្នកគួរព្យយាមរៀបចំផែនការឱ្យបានល្អដើម្បីដើរឱ្យដល់ចំណុចដែលអ្នកចង់ទៅ។ ជំនួសឱ្យការភ័យខ្លាចថាទៅមិនដល់ អ្នកគួរតែដាក់ចិត្តដាក់កាយថា ដើម្បីទៅឱ្យដល់កន្លែងដែលអ្នកចង់ទៅតើអ្នកត្រូវត្រៀមខ្លួនអ្វីខ្លះ។
ហើយតើធ្វើបែបណាដើម្បីសម្រេចគោលដៅដែលអ្នកគិតថា មិនធ្លាប់បានទៅពីមុន។ បន្ទាប់មកចាប់ផ្តើមរៀបចំសកម្មភាពដើម្បីអភិវឌ្ឍខ្លួនឯង ពីមួយជំហានទៅមួយជំហានរហូតទៅឱ្យដល់ដោយភាពក្លាហាន៕