សូមចូល Telegram ក្រមាប៉ុស្ដិ៍ ទទួលបានអត្ថបទឆាប់រហ័ស
ការចាប់ផ្តើមថ្ងៃថ្មីសកម្មភាពថ្មីជារឿងដែលយើងម្នាក់ៗ ធ្វើដើម្បីបំពេញមុខងារ រកស៊ី ឬធ្វើដើម្បីបំពេញគោលដៅជីវិតរបស់យើង។ យ៉ាងណាមិញ ដើម្បីឱ្យការផ្តើមថ្ងៃថ្មីនេះដោយមានភាពស្វាហាប់ និងស្រស់ស្រាយជានិច្ចពិសេសនាពេលផ្តើមចេញពីព្រឹកព្រលឹមចំណុចដើម្បីទទួលបានបទពិសោធនេះត្រូវបានអ្នកស្រាវជ្រាវជាច្រើនបង្ហាញវិធីជាចំណុចៗដូចខាងក្រោម៖
១.មានផ្កាស្រស់ៗក្បែរកន្លែងគេង
អ្នកចិត្តសាស្រ្តនៃសាកលវិទ្យាល័យ Harvard សហរដ្ឋអាមេរិក Nancy Etcoff បានឱ្យដឹងថាការដាក់ផ្កាស្រស់ៗនៅកន្លែងដែលអ្នកអាចឃើញវានៅពេលភ្ញាក់ពីគេងគឺបន្ថយនូវភាពអន្ទះអន្ទែងអារម្មណ៍ និងការស្រ្តេសចេញព្រមទាំងជួយបង្កើនអារម្មណ៍យើងបានល្អប្រសើរ។
២.បន្ថែមព័ណ៌ខ្លះនៅបន្ទប់គេងរបស់អ្នក
ឧទាហរណ៍អ្នកអាចបន្ថែមតុដាក់របស់របរតាំង ឬដាក់នាឡិការោទ៍ដែលតុនោះអាចមានព័ណ៌ឆើត។ នៅពេលព្រឹក ពេលមានពន្លឺចាំងចូលព័ណ៌នៃវត្ថុនឹងផ្តល់ជាប្រភពនៃថាមពលដល់យើងនាំឱ្យអារម្មណ៍យើងបានប្រសើរ និងមានភាពសកម្មសម្រាប់ក្រោកទៅបំពេញការងារនាថ្ងៃនេះ។
៣.ឱ្យពន្លឺចាំងចូល
ពន្លឺជាធម្មជាតិចាំងចូលមកបន្ទប់គេងរបស់អ្នកនឹងជួយបន្ថយអ័រម៉ូនមេឡាតូនីនជួយដាស់អ្នកឱ្យភ្ញាក់ពីគេងបន្តិចម្តងៗ។ ដូចនេះ អ្នកអាចច្នៃបន្ទប់អ្នកឱ្យមានបង្អួច ឬចន្លោះដែលអាចឱ្យពន្លឺចេញចូលក្នុងកន្លែងគេងអ្នកបានដើម្បីទទួលបានប្រយោជន៍នេះ។
៤.បញ្ជីបទចម្រៀងពេលព្រឹក
ដោយផ្អែកលើលទ្ធផលសិក្សាជាច្រើនបង្ហាញថាការស្តាប់តន្រ្តីញាក់ក៏ជួយជម្រុញឱ្យអារម្មណ៍បានស្រស់ស្រាយ និងក្លៀវក្លាសម្រាប់ទៅបំពេញសកម្មភាពការងារ។ ដូចនេះ ការមានបញ្ជីបទចម្រៀងហើយមានពេលប្រហែល១២នាទីសម្រាប់ស្តាប់បទចម្រៀងនោះក៏ជាចំណែកជួយឱ្យយើងបានសកម្មសម្រាប់សកម្មភាពថ្មីផងដែរ។
៥.អាហារពេលព្រឹកសម្រាប់ខ្លួនឯង
ប្រាកដណាស់អាហារពេលព្រឹកជារឿងមិនអាចខ្វះបានសម្រាប់ជាថាមពលទៅបំពេញកិច្ចការងារប្រចាំថ្ងៃ។ អ្នកអាចរីករាយនឹងការធ្វើអាហារពេលព្រឹកសម្រាប់ខ្លួនឯងក្នុងពេលវេលាសមស្របមួយដែលអ្នកអាចធ្វើបាន។ របបអាហារពេលព្រឹកអ្នកធ្វើដោយខ្លួនឯងនឹងផ្តល់ឱ្យអ្នកនូវថាមពលនិងរីករាយសម្រាប់ផ្តើមថ្ងៃថ្មី។
៦.លំហាត់ប្រាណយ៉ូហ្គា(Yoga)
ចលនាហាត់ពត់ខ្លួនយ៉ូហ្គាតាមលទ្ធផលនៃការស្រាវជ្រាវជាច្រើនក៏បានបង្ហាញដែរថាជួយឱ្យអារម្មណ៍យើងបានស្រស់ថ្លាបន្ថយអារម្មណ៍តានតឹងម៉ួហ្មងទាំងឡាយ។ លំហាត់ប្រាណនេះជួយអ្នកស្រួលខ្លួន និងសកម្មភាពទៀតផង។ដូចនេះអ្នកសាកល្បងរៀនយ៉ូហ្គា និងហាត់អនុវត្តវាដើម្បីពេលព្រឹកស្រស់ស្រាយរបស់អ្នកបាន៕