កុមារជាវ័យដែលកំពុងចាប់យកអ្វីគ្រប់យ៉ាងពីមនុស្សធំ និងប្រៀបដូចជាក្រដាសសដែលអាចកត់ត្រានូវរឿងរ៉ាវទាំងល្អ និងមិនល្អបានយ៉ាងលឿនបំផុត។ ហេតុនេះ ដើម្បីអភិវឌ្ឍជីវិតកុមារឱ្យបានល្អ អាណាព្យាបាលគួរឧស្សាហ៍អានសៀវភៅ ដែលពោរពេញដោយតម្លៃអប់រំដើម្បីឱ្យពួកគេស្តាប់។
ពាក់ព័ន្ធនឹងបញ្ហានេះ អង្គការទស្សនៈពិភពលោក (world vision) បានបញ្ចាក់ថាការថែទាំកុមារតម្រូវឱ្យមានការយកចិត្តទុកដាក់ពីឪពុក ម្ដាយ និងអ្នកថែទាំដើម្បីឱ្យពួកគេទទួលបានការលូតលាស់ដ៏សមប្រកប និងមានសុខភាពល្អ។ បន្ថែមពីនេះការបង្រៀនកុមារឱ្យមានទម្លាប់អានសៀវភៅ ជាផ្នែកសំខាន់មួយសម្រាប់ឱ្យកុមារអភិវឌ្ឍប្រកបដោយភាពឆ្លាតវៃ និងមានទម្លាប់ល្អថែមទៀតផង។
ដើម្បីបណ្តុះកុមារឱ្យមានទម្លាប់អាន អាណាព្យាបាលគួរយល់ដឹងពីគន្លឹះសំខាន់ៗមួយចំនួន ដើម្បីធ្វើឱ្យកុមារជក់ចិត្តជាមួយនឹងសៀវភៅ។
១.ជ្រើសរើសរឿងដែលសាកសមទៅតាមអាយុកុមារ
កុមារមិនដូចមនុស្សធំនោះទេ។ អារម្មណ៍ ចំណូលចិត្តនិងសកម្មភាពរបស់ពួកគេតែងតែប្រែប្រួលទៅតាមដំណាក់កាលនានានៃការវិវដ្តនៃអាយុរបស់ពួកគេ។ ហេតុនេះ ប្រសិនបើអាណាព្យាបាលចេះជ្រើសរើសសៀវភៅត្រឹមត្រូវដើម្បីអានឱ្យកូនស្តាប់ នោះពួកគេនឹងអាចអភិវឌ្ឍបានល្អទាំងភាសា ការគិត និងរីករាយជាមួយនឹងរឿងទាំងអស់នោះ។
២. ប្តូរសំឡេងទៅតាមតួអង្គ
កុមារចូលចិត្តពណ៌ សំឡេង រូបភាពនិងភាពស្និទ្ធស្នាល។ ហេតុនេះប្រសិនបើអាណាព្យាបាលអាចប្រើប្រាស់សិល្បៈបានល្អក្នុងការបង្រៀនពួកគេនោះកុមារនឹងរីករាយ ហើយចូលចិត្តការសិក្សាកាន់តែខ្លាំង។ សម្រាប់ការអានរឿងកុមារវិញអាណាព្យាបាលគួរចេះប្តូរសំឡេងទៅតាមតួអង្គនីមួយៗ ហើយបង្ហាញរូបភាបដល់ពួកគេដើម្បីឱ្យគេកាន់តែមានអារម្មណ៍ថាគេស្ថិតក្នុងសាច់រឿងដែលយើងកំពុងនិទាននោះ។
៣. ប្រើទំនាក់ទំនងក្រសែភ្នែកជាមួយកុមារ
ការអានសៀវភៅសម្រាប់កុមារចាំបាច់ត្រូវតែទាក់ទងជាមួយពួកគេឱ្យជាប់ ព្រោះអារម្មណ៍របស់ពួកគេតែងតែប្រែប្រួលឥតឈប់ឈរ។ ក្នុងរយៈពេល១០នាទី កុមារអាចប្រែប្រួលអារម្មណ៍រាប់មិនអស់ហេតុនេះប្រសិនបើយើងមិនអាចភ្ជាប់ទំនាក់ទំនងផ្នែកអារម្មណ៍ជាមួយគេបានល្អទេ នោះគេនឹងលែងចាប់អារម្មណ៍លើសៀវភៅដែលយើងកំពុងអាន ហើយងាកទៅលេងអ្វីផ្សេងៗខាងក្រៅវិញម្តង។
ហេតុនេះ ដើម្បីភ្ជាប់ទំនាក់ទំនងបានល្អ អាណាព្យាបាលគួរកុំអានតែសៀវភៅ តែក៏គួរងាកមកលេងជាមួយពួកគេផងដែរដើម្បីឱ្យគេនៅជាមួយសាច់រឿងរហូតដល់ចប់៕