អបអរសាទរដែលប្រវត្តិរូបរបស់អ្នកត្រូវបានក្រុមហ៊ុនពេញចិត្ត និងអញ្ជើញទៅសម្ភាសសម្រាប់ដំណាក់កាលបន្ត។ អ្នកត្រូវត្រៀមខ្លួនឱ្យបានកាន់តែច្រើន ដើម្បីកុំឱ្យមានកំហុសដែលអាចធ្វើឱ្យអ្នករបូតឱកាសការងារនេះ។
ខាងក្រោមនេះគឺជារឿង ៨យ៉ាងដែលគួរជៀសវាងក្នុងពេលមកសម្ភាសការងារដែលអ្នកមិនគួរមើលរំលង។
មិនបានស្រាវជ្រាវអំពីក្រុមហ៊ុន ឬមុខតំណែងដែលខ្លួនកំពុងសម្ភាស
មុនពេលដាក់ពាក្យសុំការងារអ្នកគួរតែធ្វើការស្រាវជ្រាវត្រួសៗអំពីក្រុមហ៊ុនដែលអ្នកកំពុងដាក់ពាក្យ ដើម្បីប្រាកដថាគុណតម្លៃរបស់អ្នកត្រូវជាមួយក្រុមហ៊ុន។ ប្រសិនបើអ្នកចង់សម្ភាសដោយមានសុវត្ថិភាព សូមប្រាកដថាអ្នកបានស្រាវជ្រាវបន្ថែមទៀតអំពីក្រុមហ៊ុន បែបនេះទើបអ្នកអាចឆ្លើយសំណួរដែលអ្នកសម្ភាសអាចនឹងសួរមកអ្នកដោយមានទំនុកចិត្ត។
មកយឺតពេល ឬមិនបានសាកល្បងបច្ចេកវិទ្យាវីដេអូ (សម្រាប់ការសម្ភាសតាមអនឡាញ)
អ្នកគួរតែមកដល់កន្លែងសម្ភាសឱ្យបានយ៉ាងហោចណាស់ ១០នាទីមុន សម្រាប់ការសម្ភាសដោយផ្ទាល់ ប៉ុន្តែក៏ត្រូវប្រាកដថាអ្នកមិនមកលឿនពេកដែរ។ កុំភ្លេចរៀបចំផែនការធ្វើដំណើររបស់អ្នកឱ្យបានមុន និងរួចរាល់ ដោយគិតគូរពីរឿងស្ទះចរាចរណ៍ស្ថានភាពដែលមិនបានរំពឹងទុកផ្សេងៗ ឬពីអ្នកសម្ភាសន៍ ឬអាចនិយាយបានថាដើម្បីអនុញ្ញាតឱ្យខ្លួនអ្នកមានពេលខ្លះបំពេញឯកសារមុនឡើងទៅសម្ភាស។
ចំណែកការសម្ភាសតាមវីដេអូខលកំពុងក្លាយជាវិធីសាស្ត្រដែលនិយោជិតភាគច្រើនកំពុងប្រើជាពិសេសក្នុងអំឡុងពេលកូវីដ១៩នេះ។ អ្នកត្រូវច្បាស់ថាបានទាញយក និងសាកល្បងប្រព័ន្ធដែលត្រូវប្រើដើម្បីធ្វើវីដេអូខលនេះ ជៀសវាងមានការរអាក់រអួលពេលដល់ម៉ោងសម្ភាស។
បង្ហាញការមិនយកចិត្តទុកដាក់ឬចាប់អារម្មណ៍លើការសម្ភាស
ដំណាក់កាលសម្ភាសគឺជាដំណាក់កាលដ៏សំខាន់មួយដើម្បីស្វែងយល់ពីអាកប្បកិរិយា និងការយកចិត្តទុកដាក់ចំពោះការងាររបស់បេក្ខជន។ ដូច្នេះប្រសិនបើអ្នកបង្ហាញឥរិយាបថណាមួយដែលអ្នកសម្ភាសមើលឃើញពីភាពខ្ជះខ្ជាយ ឬឥរិយាបថមិនល្អ វាអាចនឹងជាឧបសគ្គមួយដែលរារាំងអ្នកមិនអាចទទួលបានការងារដែលខ្លួនកំពុងស្រមៃក៏ថាបាន។
ភ្លេចសួរ ឬមិនបានត្រៀមសំណួរដើម្បីសួរទៅខាងក្រុមហ៊ុនវិញ
ស្រដៀងគ្នានឹងចំណុចខាងលើដែរ ប្រសិនបើអ្នកមិនរៀបចំសំណួរហោចណាស់ក៏ពីរបីសម្រាប់សួរទៅអ្នកសម្ភាសវិញនោះពួកគេនឹងគិតថាអ្នកមិនចាប់អារម្មណ៍ ឬមិនបានត្រៀមទុកសម្រាប់ការសម្ភាសមួយនេះឡើយ។ ដូច្នេះចូរព្យាយាមរៀបចំសំណួរពីរឬបីសំណួរឱ្យបានរួចជាស្រេច ឬលើសពីនេះដើម្បីបង្ការក្រែងលោចំណុចខ្លះអ្នកសម្ភាសបានឆ្លើយជាមុនរួចហើយ។
សំណួរមួយចំនួនដែលអ្នកអាចសួរបានមានដូចជា៖
- តើអ្វីជាផ្នែកដែលអ្នកពេញចិត្តបំផុតអំពីការធ្វើការនៅ [ឈ្មោះក្រុមហ៊ុន]?
- តើថ្នាក់ដឹកនាំនឹងរំពឹងអ្វីខ្លះពីតួនាទីមួយនេះក្នុងរយៈពេល ៣០ ៦០ ឬ៩០ ថ្ងៃដំបូងនៃការចូលធ្វើការ?
- តើជំនាញឬបុគ្គលិកលក្ខណៈអ្វីខ្លះដែលអ្នកគិតថានឹងធ្វើឱ្យបេក្ខជនដែលដាក់ពាក្យក្នុងតួនាទីនេះអាចទទួលបានជោគជ័យ? -ល-
និយាយអាក្រក់ពីកន្លែងធ្វើការមុន
អ្នកសម្ភាសអាចនឹងសួរអ្នកថា ហេតុអ្វីបានជាអ្នកចេញពីកន្លែងធ្វើការមុនៗ? ហេតុអ្វីបានជាអ្នកស្វែងរកឱកាសការងារថ្មី ឬក៏អ្វីដែលអ្នកមិនចូលចិត្តអំពីការងារមុនរបស់អ្នកជាដើម។ សូមកុំយកវាជាឱកាសដើម្បីបង្ហាញពីការលំបាក ឬទុក្ខសោករបស់អ្នកនៅកន្លែងចាស់។ ផ្ទុយទៅវិញ ចូរផ្តោតលើឱកាសដែលមុខតំណែងថ្មីនេះនឹងផ្តល់ឱ្យអ្នកនូវអ្វីដែលតួនាទីពីមុនរបស់អ្នកមិនមាន។ ឧទាហរណ៍៖ ខ្ញុំកំពុងស្វែងរកឱកាសទទួលយកតួនាទីដែលអនុញ្ញាតឱ្យខ្ញុំគ្រប់គ្រងអ្នកដទៃបាន ឬខ្ញុំចង់មានឱកាសគ្រប់គ្រងថវិកា និងធ្វើការកាន់តែច្រើនជាងក្នុងផ្នែកហិរញ្ញវត្ថុ។
លើករឿងប្រាក់ខែមកនិយាយលឿនពេក
វិធាននៃការលើកមេដៃសម្រាប់ពេលសម្ភាសការងារ គឺមិនមែនអ្នកដែលលើករឿងប្រាក់ខែមកនិយាយដំបូងគេនោះទេ។ ទោះបីជាវាជាផ្នែកមួយដ៏សំខាន់នៃការស្វែងរកការងារក៏ដោយ តែការនិយាយពីប្រាក់ខែលឿនបែបនេះពេកនឹងបង្ហាញដល់និយោជកថាអ្នកយកចិត្តទុកដាក់តែចំពោះរឿងនេះច្រើនជាងការរៀនសូត្របន្ថែម ទោះបីជាអ្នកស័ក្ដិសមសម្រាប់តួនាទីនេះក៏ដោយ។
ដូច្នេះ សូមកុំបារម្ភអី! អ្នកនឹងអាចចរចារឿងនេះនៅពេលចុងបញ្ចប់ ព្រោះអ្នកសម្ភាសនឹងសួរអ្នកអំពីប្រាក់ខែដែលអ្នករំពឹងទុក ហើយអ្នកអាចសួរនាំបន្ថែមពីអត្ថប្រយោជន៍ផ្សេងៗបានទៅតាមនោះ។
ការស្លៀកពាក់មិនសមរម្យ
ចំណាប់អារម្មណ៍ដំបូងដែលអ្នកទទួលបានពិន្ទុតិចឬច្រើនគឺពឹងលើរូបរាងខាងក្រៅរបស់អ្នកនេះហើយ។ ថ្ងៃមកសម្ភាសការងារ អ្នកត្រូវប្រាកដថាស្រាវជ្រាវអំពីអ្វីដែលកូដសម្លៀកបំពាក់ទូទៅរបស់ក្រុមហ៊ុននោះ ហើយផ្គូរផ្គងជាមួយខោអាវដែលអ្នកមាន ឬអាស្រ័យទៅតាមតួនាទីដែលអ្នកកំពុងតែដាក់ពាក្យ។ សូមកុំព្យាយាមទាក់ទាញចំណាប់អារម្មណ៍អ្នកសម្ភាសដោយការស្លៀកពាក់សិចស៊ីស្លៀកពាក់ប្លែកៗ ឬពិបាកក្នុងការធ្វើដំណើរជាដើមដែលអាចនឹងនាំឱ្យអ្នកមកយឺត ឬមិនស្រណុកពេលកំពុងសម្ភាសជាដើម៕