សុខភាពផ្លូវចិត្តជាចំណុចសំខាន់មួយសម្រាប់មនុស្សគ្រប់គ្នា ព្រោះទោះបីជាមានរាងកាយមាំមួនឬមានថាមពលផ្លូវកាយច្រើនប៉ុណ្ណាក៏ដោយក៏មិនអាចអភិវឌ្ឍជីវិតបានល្អដែរប្រសិនបើផ្លូវចិត្តមានបញ្ហា។
តាមការចេញផ្សាយរបស់ស្ថាប័ន The Healthy បានឱ្យដឹងថា ផ្លូវចិត្តគឺប្រៀបដូចជាកកម្មវិធីកុំព្យូទ័រ (software)ខណៈរូបរាងកាយរបស់យើងគឺប្រៀបបានទៅនឹងគ្រឿងបង្គុំ (hardware) ហេតុនេះទោះបីជាគ្រឿងបង្គុំល្អប៉ុណ្ណាក៏ដោយ ប្រសិនបើកម្មវិធីមានមេរោគរាងកាយរបស់យើង នឹងមិនអាចដំណើរការបានល្អនោះទេ ផ្ទុយមកវិញវាអាចបណ្តាលឱ្យកើតជាជំងឺផ្លូវកាយថែមទៀតផង ប្រសិនបើបណ្តែតបណ្តោយឬមិនយកចិត្តទុកដាក់ថែរទាំងផ្នែកផ្លូវចិត្ត។
ស្ថាប័នខាងលើបានលើកឡើងនូវទម្លាប់សាមញ្ញៗចំនួន២យ៉ាង ដែលអាចជួយឱ្យយើងគ្រប់គ្នាមានសុខភាពផ្លូវចិត្តល្អនិងមានគំនិតវិជ្ជមានសម្រាប់ការរស់នៅ។
១. អានសៀវភៅរាល់ព្រឹក
ពេលព្រឹកជាពេលវេលាសំខាន់ដែលខួរក្បាលរបស់មនុស្សម្នាក់ៗ ស្រលះល្អ គ្មានកង្វល់និងមានថាមពលខ្ពស់ជាងភាពតានតឹង។ ហេតុនេះពេលព្រឹកជាពេលដែលថាមពលផ្នែកផ្លូវចិត្តរឹងមាំខ្លាំង និងមានថាមពលខ្ពស់បំផុត។
ប្រសិនបើយើងបានចំណាយពេលព្រឹកដើម្បីអានសៀវភៅជាប្រចាំយ៉ាងហោចណាស់៣០នាទី នោះយើងនឹងអាចប្រើប្រាស់ថាមពលដ៏អស្ចារ្យនេះជាមួយនឹងថាមពលនៃភាពវិជ្ជមានសមាធិល្អ និងគិតបានរហ័ស។ ជាធម្មតា ការអានសៀវភៅជំរុញឱ្យយើងមានការស្រមើស្រមៃខ្ពស់ រួមជាមួយនឹងការពិចារណាភ្ជាប់មកជីវិតរស់នៅជាក់ស្តែងដែលធ្វើឱ្យខួរក្បាលរបស់យើងទាំងពីរផ្នែក អាចភ្ជាប់ទំនាក់ទំនងគ្នាបានល្អបំផុត។
២. សម្រាកឱ្យបានគ្រប់គ្រាន់ និងចេញឱ្យឆ្ងាយពីបណ្តាញសង្គមនៅពេលយប់
ដំណេក ជាពេលវេលាសំខាន់បំផុតសម្រាប់ជីវិត។កាលណាយើងសម្រាកបានគ្រប់គ្រាន់ នោះយើងនឹងមានថាមពល ស្មារតី និងភាពច្នៃប្រឌិតខ្ពស់។ វាជាចំណុចចាប់ផ្តើមនៃការអភិវឌ្ឍផ្នែកផ្លូវចិត្ត និងរាងកាយ។ ផ្ទុយមកវិញប្រសិនបើយើងសម្រាកមិនបានស្កប់ស្កល់ ឬសម្រាកមិនគ្រប់គ្រាន់ជីវិតយើងម្នាក់ៗនឹងរស់នៅក្នុងអារម្មណ៍ទុក្ខព្រួយ ញ័រទ្រូង ឆាប់ភ័យនិងឆាប់បាក់ទឹកចិត្ត។
អ្នកចិត្តសាស្ត្រជាច្រើនសុទ្ធតែបង្ហាញភស្តុតាងដូចៗគ្នាថាបញ្ហាដំណេកមិនគ្រប់គ្រាន់នាពេលបច្ចុប្បន្ននេះកើតឡើងដោយសារតែការប្រើប្រាស់បណ្តាញសង្គមរហូតដល់យប់ជ្រៅខ្លាំងពេក។ ការប្រើប្រាស់បណ្តាញសង្គម ធ្វើឱ្យខួរក្បាលរបស់យើងមិនបានសម្រាកហើយទទួលរឿងជាច្រើននៅពេលថាមពលរាងកាយរបស់យើងថយចុះ។ ហេតុនេះវានឹងធ្វើឱ្យខួរក្បាលរបស់យើងស្ថិតក្នុងដំណាក់កាល ឬរលកខួរក្បាលអាក្រក់។ ស្ថានភាពនេះ នឹងធ្វើឱ្យយើងមារនអារម្មណ៍មិនល្អពេញមួយថ្ងៃក្រោយពេលងើបពីដំណឹក។បន្ថែមពីលើនេះ ប្រសិនបើយើងស្ថិតក្នុងជីវិតបែបនេះរាល់ថ្ងៃយើងនឹងទទួលរងនូវបញ្ហាផ្លូវចិត្តជាក់ជាមិនខាន៕