ជំងឺផ្លូវដង្ហើមកូវីដ១៩ នៅតែបន្តយាយីពិភពលោកមិនទាន់ថមថយចុះនៅឡើយ។ ជាមួយគ្នានេះការអនុវត្តវិធានការទប់ស្កាត់ការរីករាលដាលនៃជំងឺនេះ គឺជាទម្លាប់ថ្មីសម្រាប់ប្រជាពលរដ្ឋពិភពលោកទូទៅតែជាចំណែកសំខាន់មិនអាចខ្វះបាន ដើម្បីកាត់បន្ថយឥទ្ធិពលជំងឺរាតត្បាតនេះ។ តាមរយៈអង្គការសុខភាពពិភពលោកក៏ចេញជាគន្លឹះខ្លះៗ ដែលជាប្រយោជន៍ជួយរក្សាសុខភាពផ្លូវចិត្តក្នុងអំឡុងពេលអនុវត្តទម្លាប់ថ្មីពិសេសក្នុងវិបត្តិជាសកលនេះ។
១.តាមដានព័ត៌មានថ្មីៗ
តាមដានព័ត៌មានថ្មីជាដំបូន្មាន និងអនុសាសន៍ពីក្រសួងសុខាភិបាលនិងអាជ្ញាធរមូលដ្ឋាន។ រកប្រភពព័ត៌មានណាដែលអាចជឿទុកចិត្តបានដូចជាទំព័រផ្លូវការនៃស្ថាប័នជាតិទូរទស្សន៍ ឬវិទ្យុជាតិនិងតាមដានព័ត៌មានថ្មីៗពីអង្គការសុខភាពពិភពលោកជាដើម។
២.បង្កើតទម្លាប់ថ្មីល្អៗ
រក្សាសកម្មភាពជាទម្លាប់ល្អឬបង្កើតចេញជាទម្លាប់ថ្មីល្អដូចជា៖
ចូលគេង និងក្រោកមានពេលវេលាទៀងទាត់
រក្សាអនាម័យខ្លួនប្រាណ
ញ៉ាំអាហារសុខភាព និងទៀងទាត់ពេលវេលា
ធ្វើលំហាត់ប្រាណ
បែងចែកពេលធ្វើការ និងមានពេលសម្រាកគ្រប់គ្រាន់
មានពេលសម្រាប់ធ្វើរឿងដែលអ្នកចូលចិត្ត
៣.កាត់បន្ថយព័ត៌មានមិនល្អ
ព័ត៌មានមិនល្អសម្តៅលើព័ត៌មានដែលធ្វើឱ្យអ្នកអាន ឬស្តាប់មានអារម្មណ៍ស្ត្រេសតានតឹង ឬភ័យខ្លាច។ស្វែងរកព័ត៌មានដែលជាប្រយោជន៍ក្នុងការរក្សាការពារសុខភាពអ្នក ពិសេសព័ត៌មានថ្មីៗចុងក្រោយ។
៤.ការសម្លឹងមើលអេក្រង់រយៈពេលយូរក៏គួរកាត់បន្ថយ
រៀងរាល់ថ្ងៃការចំណាយពេលយូរម៉ោងទៅលើអេក្រង់គ្រឿងអេឡិចត្រូនិច ក៏គួរមានវិធីសាស្រ្តដើម្បីសម្រាកភ្នែកខ្លះ ព្រោះការសម្លឹងមើលយូរម៉ោងក៏មានឥទ្ធិពលលើសុខភាព និងអារម្មណ៍របស់យើងផងដែរ។
៥.ការប្រើប្រាស់បណ្តាញសង្គមបានត្រឹមត្រូវ
ប្រើប្រាស់បណ្តាញទំនាក់ទំនងសង្គមអ្នកជាប្រយោជន៍ដូចជា ការចែករំលែកគន្លឹះណែនាំ ការលើកទឹកចិត្ត ឬរឿងរ៉ាវជោគជ័យណាមួយ ជាចំណុចវិជ្ជមានជាជាងព័ត៌មានបំភ័យ ឬព័ត៌មានធ្វើឱ្យអារម្មណ៍តានតឹង។
៦.ចូលរួមចំណែកលើកទឹកចិត្តបុគ្គលិកសុខភិបាល
អ្នកក៏ជាអ្នកចូលរួមចំណែកសំខាន់ជួយលើកទឹកចិត្តដល់បុគ្គល ឬអ្នកធ្វើការក្នុងផ្នែកសុខាភិបាលទាំងអស់បានដែរ តាមរយៈសារនៅលើអនឡាញ។ ចូលរួមលើកទឹកចិត្តពួកគេក្នុងកិច្ចខិតខំប្រឹងប្រែងប្រយុទ្ធប្រឆាំងនឹងជំងឺកូវីដ១៩សម្រាប់មនុស្សទាំងអស់គ្នា៕