សូមចុចទីនេះដើម្បីទាញយកកម្មវិធី ក្រមា ប៉ុស្ដិ៍ ដាក់ក្នុងទូរស័ព្ទដៃ
៣០ឆ្នាំអាចនិយាយបានថា ជាវ័យមានបទពិសោធច្រើន និងឈានដល់ដំណាក់កាលមួយដែលគួរស្គាល់នូវអ្វីទៅ ជាភាពជោគជ័យនៃជីវិតដែលយើងខ្លួនឯងជាអ្នកកំណត់ ហើយក៏ជាវ័យមួយដែលមានផ្លូវត្រូវដើរដោយផែនការច្បាស់លាស់ផងដែរ។ ដូចនេះ នៅពេលយើងមានវ័យមុនឈានចូល៣០ឆ្នាំយើងក៏អាចមានជាផែនការសកម្មភាពខ្លះៗ ដើម្បីអនុវត្តប្រចាំថ្ងៃជាស្ពានចំលងយើងទៅភាពជោគជ័យនៅវ័យនោះដែលចំណុចទាំងនោះ ត្រូវបានចែករំលែកពីអ្នកមានបទពិសោធមុនៗ ដូចខាងក្រោមនេះ៖
១.ចាប់ផ្តើមវិនិយោគបូករួមនឹងសន្សំ
ចាប់ផ្តើមប្រលូកក្នុងការវិនិយោគមានន័យថា យើងនឹងចេះទទួលខុសត្រូវលើការបង្កើតប្រភពចំណូលថវិកាបន្ថែមដល់ខ្លួនឯង។ មិនថា ការចាប់វិនិយោគលើខ្លួនឯងនូវចំណេះ ជំនាញមួយពិតប្រាកដ ឬការវិនិយោគលើទ្រព្យសម្បត្តិ ដែលអាចលក់ចំណេញ កើនថវិកាសុទ្ធសឹងជារឿង ដែលយើងគួរសាកល្បងដើម្បីទទួលបានជាបទពិសោធថ្មី និងបានស្វែងយល់ពីវា។ ទន្ទឹមនឹងនោះការរំលែកថវិកាសន្សំខ្លះ គឺប្រៀបដូចជាការត្រៀមសុវត្ថិភាពសម្រាប់ខ្លួនឯង ទុកមុនមិនថារឿង ឬបញ្ហាអ្វីកើតឡើងនៅថ្ងៃមុខយើងក៏មានថវិកាគ្រប់គ្រាន់សម្រាប់ការបម្រុងទុក។
២.បង្កើតទម្លាប់ថ្មីៗសម្រាប់ខ្លួនឯង
ទម្លាប់ថ្មីៗយ៉ាងហោចណាស់ ក៏ត្រូវការពេលវេលាមួយចំនួនសមគួរ ដើម្បីបង្កើតចេញជាសកម្មភាពថ្មីទៅជាទម្លាប់ថ្មីតាមដែលអ្នកចង់បាន។ ទម្លាប់ទាំងនោះអាចជាការរៀនភាសាបរទេស ការអានសៀវភៅបង្កើនគំនិត ឬការរើសប្រភេទកីឡាមួយមកហ្វឹកហាត់ថែរក្សារាងកាយ និងសុខភាព ដែលជាប្រភេទទម្លាប់ថ្មីឬសកម្មភាពផ្សេងៗទៀតដែលចូលរួមចំណែក ឱ្យផែនការជីវិតអ្នកកាន់តែរលូនទៅមុខ។ មានផែនការ រួចអនុវត្តវារៀងរាល់ថ្ងៃ អ្នកនឹងទទួលបានទម្លាប់ថ្មីជាមនុស្សថ្មី ដែលអ្នករំពឹងចង់បាននៅពេលដល់អាយុ៣០ឆ្នាំ។
៣.រៀនជាមនុស្សឯករាជ្យ
ជិតដល់វ័យប្រហែលពាក់កណ្តាលអាយុរស់នៅជាមធ្យម យើងក៏អាចរៀនជាមនុស្សឯករាជ្យច្រើនជាងមុន។ តួយ៉ាងការសម្រេចចិត្តធំៗណាមួយ ដោយមានការត្រិះរិះពិចារណាដោយខ្លួនឯងការទទួលខុសត្រូវនូវអ្វីដែលអ្នកបានធ្វើ ការធ្វើដំណើរកម្សាន្តម្នាក់ឯង ឬការចេះចម្អិនអាហារច្រើនមុខ គឺសុទ្ធសឹងជាមេរៀនដែលគួររៀនធ្វើនៅពេលមុនវ័យ៣០។ នេះព្រោះថាអ្នកមិនអាចរស់នៅដោយពឹងផ្អែកលើឪពុកម្តាយទាំងស្រុងរហូតនោះទេ ហើយអ្នកនឹងជួបជីវិតដែលតម្រូវឱ្យអ្នកចេះឯករាជ្យដោយខ្លួនឯងនៅពេលខាងមុខ មិនអាចចៀសរួច។
៤.ចាប់ផ្តើមសង្កេតនិងសម្រួចផែនការច្បាស់លាស់មួយ
វ័យជិត៣០ឆ្នាំក៏មានន័យថា អ្នកចូលចិត្តអ្វីមានឧបនិស្ស័យទៅលើអ្វីដែលជាចំណូលចិត្តរបស់អ្នក។ ដូចនេះយើងអាចសម្រួចបាននូវអ្វីដែលយើងចូលចិត្តធ្វើចង់បាន ហើយការត្រៀមធ្វើអ្វីដែលជាចំណូលចិត្តនេះនឹងមិនធ្វើឱ្យយើងហត់ឬធុញទ្រាន់នោះឡើយ ព្រោះវាជាក្តីស្រលាញ់របស់អ្នកពិតប្រាកដ។ឧទាហរណ៍អ្នករកឃើញថាអ្នកមានភាពប្រសើរផ្នែករកស៊ីជួញដូរ រកប្រភពចំណូលអាស្រ័យដោយខ្លួនឯងដូចនេះអ្នកត្រូវស្វែងផ្លូវទៅរកគោលដៅនោះ ឬអាចខុសពីនេះដោយអ្នកស្វែងយល់ថាអ្នកចូលចិត្តបំពេញកិច្ចការងារ និងទទួលចំណូលសមរម្យពីស្ថាប័នដូចនេះ អ្នកនឹងអាចមានផ្លូវដើរដោយច្បាស់លាស់ យល់ដឹង និងកំណត់បានច្បាស់នូវអ្វីជាគោលដៅដែលយើងចង់បាន ដើម្បីទៅដល់នៅពេលឈានដល់វ័យខាងមុខនៃជីវិតពិសេសសម្រាប់វ័យត្រូវមានគ្រួសារនោះ៕