ស្ថិតក្នុងវ័យ៣៩ឆ្នាំ លោកស្រី Ivanka Trump ជាសហគ្រិនស្រ្តីជោគជ័យមួយរូប និងជាអ្នកម្តាយរបស់កូនបីនាក់ តែគេអាចសង្កេតឃើញថា លោកស្រីនៅតែជោគជ័យជាមួយនឹងអាជីពការងារ ជាទីប្រឹក្សាប្រធានាធិបតី ស្នាដៃនិពន្ធសៀវភៅ មុខជំនួញ ក៏ដូចជាជីវិតគ្រួសារ។
សូមចុចទីនេះដើម្បីទាញយកកម្មវិធី ក្រមា ប៉ស្ដិ៍ ដាក់ក្នុងទូរស័ព្ទដៃលោកស្រីដែលជាកូនស្រីរបស់ ប្រធានាធិបតីសហរដ្ឋអាមេរិកផងនោះ ក៏ធ្លាប់បានចែករំលែកបទពិសោធជីវិត ជាចំណុចមួយចំនួន ដែលមនុស្សគ្រប់គ្នា អាចស្វែងយល់ដើម្បីទទួលបានជោគជ័យប្រកបដោយចំនុចវិជ្ជមាន និងភាពរីករាយទៅតាមនិយមន័យរបស់លោកស្រីផ្ទាល់៖
នៅក្នុងបទសម្ភាសជាមួយសារព័ត៌មាន Business Insider លោកស្រីបានកំណត់ឲ្យតម្លៃភាពជោគជ័យនៃជីវិតនោះគឺ "សុភមង្គល" ដែលលោកស្រីបានលើកឡើងថា៖ "ខ្ញុំមិនគិតថា អ្នកនឹងជោគជ័យពិតប្រាកដឡើយ លុះណាតែអ្នកគឺជាមនុស្សមានសុភមង្គល ហើយមានភាពពេញចិត្តចំពោះអ្វីដែលមានក្នុងជីវិតអ្នក។" លោកស្រីបន្ថែមថា "ខ្ញុំស្គាល់មនុស្សជាច្រើន ដែលជោគជ័យទៅលើអាជីព ប៉ុន្តែពួកគេពុំមានភាពរីករាយឡើយ។ តែសម្រាបខ្ញុំ គឺរីករាយនូវអ្វីដែលខ្ញុំសម្រេចបាននូវអាជីពរបស់ខ្ញុំ ហើយនិងរីករាយជាមួយស្វាមី និងកូនៗរបស់ខ្ញុំផងដែរ។"
នៅពេលដែលសារព័ត៌មានសួរថា តើអ្វីដែលនាំឱ្យលោកស្រីទទួលបានជោគជ័យដូចសព្វថ្ងៃនោះ កូនស្រីរបស់ប្រធានាធិបតីអាមេរិក Donald Trump រូបនេះបានបង្ហាញបីចំណុចធំៗដូចខាងក្រោមនេះ៖
១. កំណត់នូវអ្វីដែលអ្នកស្រលាញ់ពេញចិត្តនឹងធ្វើ ហើយធ្វើវា
“វាពិតជាការពិបាកណាស់ ដើម្បីទៅរកភាពជោគជ័យនូវអ្វីដែលអ្នកធ្វើ ប្រសិនបើអ្នកមិនមានចិត្តស្រលាញ់" នាងបានបន្ថែមទៀតថា "ខ្ញុំស្គាល់មនុស្សជោគជ័យជាច្រើន ដែលភាពជោគជ័យនោះមិនដែលខិតឆ្ងាយពីពួកគេឡើយ នោះក៏ដោយសារការស្រលាញ់ ព្យាយាម និងយកចិត្តទុកដាក់នោះ។"
២. ជ្រើសរើសដៃគូជីវិតត្រឹមត្រូវ
“ប្រសិនបើអ្នកមានទំនាក់ទំនងស្នេហា គួរតែជាដៃគូជីវិតដ៏ត្រឹមត្រូវ។ ប្រសិនបើខ្ញុំមានស្វាមីដែល ពុំបានជ្រោមជ្រែងដល់ការសម្រេចចិត្តទៅលើជីវិតការងាររបស់ខ្ញុំទេ នោះប្រហែលខ្ញុំជួបនឹងស្ថានភាពលំបាកជាពុំខាន។" នេះបើតាមការលើកឡើងរបស់ លោកស្រី Ivanka Trump។
៣. នៅក្បែរមនុស្សវិជ្ជមាន
"អ្នកគិតអវិជ្ជមានច្រើន គឺបង្កជាបញ្ហា" លោកស្រី Ivanka Trump បានបន្តទៀតថា "ខ្ញុំស្រលាញ់អ្នកមានគំនិតសុទិដ្ឋិនិយម(គិតវិជ្ជមាន) ហើយនេះខ្ញុំពុំមែនសម្តៅថា អ្នកពុំដែលឃើញពីបញ្ហានោះទេ។ ប៉ុន្តែអ្នកមានគំនិតសុទិដ្ឋិនិយម គឺជាអ្នកបង្ហាញផ្លូវដោះស្រាយបញ្ហា” ៕