ប្រាក់ចំណេញមិនមែនជានិយមន័យតែមួយគត់នៅទីនេះឡើយ។“ជោគជ័យ” នៅទីនេះមានន័យថាជា ការប្តេជ្ញាចិត្តយ៉ាងមុតមាំដើម្បីផ្តល់ភាពពេញលេញដល់ជីវិត។នៅតាមផ្លូវសំដៅទៅកាន់ភាពជោគជ័យនេះទម្លាប់នៃភាពជោគជ័យទាំងដប់ខាងក្រោមនឹងធ្វើឲ្យគ្រប់ផ្នែកទាំងអស់នៃជីវិតរបស់អ្នកទាំងជីវិតផ្ទាល់ខ្លួន និងការងារវិជ្ជាជីវៈមានភាពល្អប្រសើរឡើង។
១. មើលឃើញតម្លៃគ្រប់សកម្មភាព
ដើម្បីទទួលបានជោគជ័យ ចូរបញ្ជាក់អំពីលទ្ធផលនៃសកម្មភាពរបស់អ្នក។នៅពេលដែលអ្នកខិតខំប្រឹងប្រែងដើម្បីភាពជោគជ័យចូរយកចិត្តទុកដាក់ចំពោះគ្រប់សកម្មភាពទាំងអស់ និងផ្តល់អត្ថន័យនិងតម្លៃដល់ដំណាក់កាលនីមួយៗ។
សកម្មភាពណាមួយដែលខ្វះខាតគោលបំណងជាក់លាក់នឹងធ្វើឲ្យអ្នកមានទន់ខ្សោយក្នុងការប្រឈមជាមួយបញ្ហាដែលមិនបានរំពឹងទុក។ដូច្នេះ ចូរបង្កើតទម្លាប់ក្នុងការផ្តល់ទិសដៅដល់រាល់សកម្មភាពលម្អិតនីមួយៗនៃអាជីវកម្មរបស់អ្នកដើម្បីឆ្ពោះទៅកាន់ការសម្រេចចក្ខុវិស័យនិងគោលដៅកាន់តែធំ ។ អ្នកត្រូវបណ្តុះចិត្តគំនិត ធ្វើការងារដែលមានការលំបាកនិងមានលក្ខណៈប្រកួតប្រជែងខ្លាំង។
នៅពេលដែលគ្រប់សកម្មភាពទាំងអស់មានគុណតម្លៃអ្នកនឹងអាចគ្រប់គ្រងលើការធ្វើឲ្យសកម្មភាពទាំងនោះកាន់តែមានភាពជាក់ស្តែង ជាក់លាក់និងពោរពេញដោយគោលដៅ។ តាមរយៈសកម្មភាពលម្អិតទាំងនេះហើយ ដែលធ្វើឲ្យអ្នកអាចបំពេញតាមការពេញចិត្តរបស់អ្នក។
២. ប្រើប្រាស់ភាពជ្រះស្រឡះនៃខួរក្បាល
ជៀសវាងភាពយឹតយ៉ាវចំពោះការងារពាក់ព័ន្ធនឹងខួរក្បាល។រៀនធ្វើការសម្រេចចិត្តដែលឆាប់រហ័ស និងមានភាពប្រាកដប្រជា។ ភាពជ្រះស្រឡះនៃខួរក្បាលធ្វើឲ្យខួរក្បាលអាចមើលឃើញកាន់តែងាយស្រួលថាតើសេចក្តីសម្រេចមួយណាដែលនាំអ្នកទៅជិត ឬទៅកាន់តែឆ្ងាយពី គោលដៅរបស់អ្នក។
ទោះបីជាយ៉ាងណាក៏ដោយមុនពេលដែលអ្នកផ្លាស់ប្តូរសេចក្តីសម្រេចណាមួយ ចូរពិចារណាដោយប្រុងប្រយ័ត្នអំពីចំណុចល្អនិងអាក្រក់នៃការផ្លាស់ប្តូរនោះ។ ភាពប្រញាប់ប្រញាល់អាចបណ្តាលឲ្យមានមហន្តរាយ។គ្រប់ពេលដែលអ្នកដូរការសម្រេចចិត្តចាស់ អ្នករត្រូវប្រើប្រាស់ឱកាសដើម្បីសិក្សាអំពីអ្វីដែលអ្នកត្រូវការដើម្បីធ្វើឲ្យបានកាន់តែល្អនៅពេលក្រោយនិងបញ្ជាក់បន្ថែមអំពីព័ត៌មានលម្អិតដែលនឹងបំពេញតាមបទដ្ឋានរបស់អ្នក។
ការសម្រេចចិត្តយ៉ាងលឿននិងការផ្លាស់ប្តូរការសម្រេចចិត្តដោយភាពឆ្លាតវៃនឹងធ្វើឲ្យមានតុល្យភាព។
៣. ស្តាប់ដោយស្វែងយល់អំពីសារនានា មិនមែនត្រឹមត្រូវស្តាប់ឮសារទាំងនោះប៉ុណ្ណោះទេ
ការស្តាប់ត្រូវចំណាយកម្លាំងជាច្រើនក្នុងការគ្រប់គ្រងខ្លួនឯងដោយអ្នកមិនត្រឹមតែត្រួតពិនិត្យសន្ទុះផ្ទាល់ខ្លួនរបស់អ្នកក្នុងការទទួលបានអ្វីដែលអ្នកចង់បានប៉ុណ្ណោះទេប៉ុន្តែថែមទាំងវិភាគអំពីសារនានាដែលអ្នកកំពុងប្រើប្រាស់នៅក្នុងការងាររបស់អ្នកដើម្បីស្វែងយល់អំពីអត្ថន័យពិតប្រាកដ ។
បង្កើតទម្លាប់ហើយខាត់បន្ថយការចាប់អារម្មណ៍ពីគ្រប់សារដែលអ្នកបានទទួលហើយស្តាប់តែអ្វីដែលបង្កប់នៅក្នុងសារនោះជំនួសវិញ។ផ្តោតចំណាប់អារម្មណ៍លើអារម្មណ៍ដែលមានពីធម្មជាតិរបស់អ្នក ដើម្បី “ស្វែងយល់”អំពីភាពរំជួលចិត្ត និងអារម្មណ៍របស់អ្នកដទៃ។ ព័ត៌មានដែលមនុស្សភាគច្រើនផ្តល់ជូនមិនមែនតាមរយៈពាក្យសំដីឡើយ។ ការពិតតែងតែត្រូវបានសម្តែងចេញមកតាមរយៈភាសាកាយវិការសូរសម្លេង ក្រសែភ្នែក និងការប៉ះពាល់ជាកស្ដែង។
ប្រសិនបើគ្មានវិន័យក្នុងការស្តាប់និងការស្វែងយល់អំពីអត្ថន័យដែលបានបង្កប់នៅក្នុងសារនានាទេនោះ អ្នកអាចនិងងាយចេញពីភាពជោគជ័យនិងមើលឃើញវាថា “ការបកប្រែខុស”។
៤. បង្កើតបញ្ជីការងារ
បង្កើតទម្លាប់ក្នុងការសរសេរអ្វីដែលអ្នកចង់សម្រេចអោយបានសម្រាប់ថ្ងៃបន្ទាប់សប្តាហ៍ក្រោយ ខែក្រោយ និងឆ្នាំក្រោយ បន្ទាប់មកធ្វើការផ្តល់អាទិភាពដល់ចំនុចទាំងនោះ។តាមវិធីនេះ អ្នកនឹងអាចចាត់ចែងយ៉ាងមានប្រសិទ្ធភាពនូវពេលវេលាដែលចាំបាច់សម្រាប់ការងារនីមួយៗយោងតាមសារៈសំខាន់របស់វា។
ចូរចងចាំថា បញ្ជី គឺជាកិច្ចសន្យា។នៅពេលដែលអ្នកសរសេរអ្វីមួយ អ្នកបានព្រមព្រៀងហើយថានឹងធ្វើឲ្យរឿងទាំងនោះអោយកើតឡើង។សកម្មភាពដែលត្រូវបានសរសេរជាលាយលក្ខណ៍អក្សរខិតទៅរកភាពអាចសម្រេចបាន ច្រើនជាងសកម្មភាពដែលអ្នកគ្រាន់តែគិតស្រមៃ។
៥. សរសេរគំនិតរបស់អ្នក ចូលក្នុងកំណត់ហេតុ
ការសរសេរគំនិតរបស់អ្នកទុកគឺជាទម្លាប់ដែលមានប្រយោជន៍មួយសម្រាប់ការបកប្រែគំនិតទាំងនោះនៅក្នុងទម្រង់ដែលអាចមើលឃើញ។ការសរសេរអាចផ្តល់ឲ្យអ្នកនូវទស្សនវិស័យអំពីអ្វីដែលអ្នកចង់បាន កន្លែងដែលអ្នកកំពុងឈរអ្វីដែលអ្នកមិនចង់ធ្វើម្តងទៀត និងអ្វីដែលអ្នកត្រូវការសម្រេចឲ្យបានដើម្បីឈានឲ្យដល់គោលដៅ ។
នៅពេលអ្នកសរសេរចេញមកខួរក្បាលខាងឆ្វេងរបស់អ្នកត្រូវបានបង្វែរចំណាប់អារម្មណ៍ពីការគិតដែលធ្វើឲ្យខួរក្បាលខាងស្តាំដែលមានគំនិតបង្កើត អាចបញ្ចេញគំនិតថ្មីៗនិងការច្នៃប្រឌិតរបស់អ្នកបានកាន់តែអស្ចារ្យដែលវាមានសារៈសំខាន់ចំពោះការនាំផ្លូវគំនិតរបស់អ្នកទៅកាន់គោលដៅ ។
ការកត់ត្រាគឺជាការអនុវត្តចុងក្រោយបំផុតដើម្បីស្វែងរកទស្សនៈវិស័យនានាក្នុងការដោះស្រាយបញ្ហា។គ្មានវិធីស្វែងរកដំណោះស្រាយជាក់ស្តែងណាមួយដែលល្អជាងការចំណាយពេលសរសេរចេញមកនូវរចនាបថភាពជោគជ័យ ភាពបរាជ័យ ការអភិវឌ្ឍ និងការបង្កើតគំនិតថ្មីៗឡើយ។
៦. ស្រឡាញ់អ្វីដែលអ្នកធ្វើ
នៅក្នុងរឿងជោគជ័យរបស់វរជនដែលយើងបានឃើញទាំងអស់ចាប់ពី Oprah រហូតដល់ Bill Gates និងរហូតដល់ Walt Disney ពួកគេគឺជាបុគ្គលដែលធ្វើអ្វី ដែលពួកគេចង់ធ្វើជាទីបំផុតហើយជាលទ្ធផលពួកគេទទួលបានប្រាក់ចំណូលដ៏ច្រើនសន្ធឹកសន្ធាប់។ ដើម្បីប្រកួតប្រជែងនឹងបុគ្គលទាំងនេះ អ្នកចាំបាច់ត្រូវតែមានការប្តេជ្ញាចិត្ត ឆ្ពោះទៅរកទិសដៅមួយដែលផ្លៃតម្លៃសម្រាប់សង្គម។
តម្លៃផ្នែកហិរញ្ញវត្ថុ គ្រាន់តែជាផលប្រយោជន៍មួយផ្នែកប៉ុណ្ណោះ។ វាជាការឆ្លុះបញ្ចាំងអំពីគុណតម្លៃដែលអ្នកបានធ្វើអោយជីវិតអ្នកដទៃប្រសើរឡើង។
៧. មានឆន្ទះក្នុងការលះបង់
ភាពជោគជ័យត្រូវតែមានការលះបង់។បង្កើតទម្លាប់ក្នុងការ “សម្តែងចេញមកខាងក្រៅ” ជាបន្តបន្ទាប់ និងជារៀងរាល់ថ្ងៃ។ មានការប្តេជ្ញាចិត្ត ចំពោះការចំណាយពេលវេលា ដោយគ្មានកំណត់និងមានឆន្ទះក្នុងការប្រើប្រាស់ពេលវេលា និងថាមពលទាំងអស់ ធ្វើការងារដើម្បីឆ្ពោះទៅកាន់គោលដៅរបស់អ្នក។
គ្មានផ្លូវដែលដើរទៅកាន់ភាពជោគជ័យ តាមរយៈភាពខ្ជិលច្រអូសនោះឡើយ។ សហគ្រិនជាច្រើនមិនទទួលបានជោគជ័យដូចអ្វីដែលពួកគេអាចទទួលបានពីព្រោះពួកគេគ្មានឆន្ទះក្នុងការ “លះបង់” ដើម្បីឈានទៅកាន់កម្រិតកពូលនៃការប្តេជ្ញាចិត្តរបស់ពួកគេ។
បង្កើតទម្លាប់ក្នុងការស្វែងរកអ្វីដែលរំខានដល់ ការធ្វើសកម្មភាពរបស់អ្នកហើយកំចាត់វាចោល ពីព្រោះអ្នកត្រូវចំណាយពេលវេលាជាច្រើនលើវាប៉ុន្តែវាមិនបានបន្ថែមគុណតម្លៃពិតប្រាកដដល់ជីវិត ឬអាជីវកម្មរបស់អ្នកឡើយ។ ចូរដាក់សកម្មភាពដែលរំខានទាំងនោះ ទៅក្នុងប្រភេទនៃការកំសាន្តនិងធ្វើការប្តេជ្ញាចិត្តក្នុងការផ្តល់អាទិភាពដល់ទំនួលខុសត្រូវ លើការងារជាមុនហើយការកំសាន្តត្រូវនៅលេខរៀងទីពីរ។
ចំណុចដំបូងគេបង្អស់ ក្នុងការផ្តោតចំណាប់អារម្មណ៍ លើភាពជោគជ័យនោះគឺការសម្រេចគោលដៅនានា ដែលអ្នកបានកំណត់ដើម្បីឈានទៅរកភាពជោគជ័យនោះ។
៨.អនុវត្តការបណ្តុះបណ្តាលខ្លួន
សហគ្រិនដែលទទួលបានភាពជោគជ័យជាពិសេសបង្កើតទម្លាប់ក្នុងការបង្កើតកិច្ចសន្ទនាក្នុងខ្លួនដែលមានភាពវិជ្ជមានមួយដូច្នេះចូរបង្កើតទម្លាប់និយាយពីភាពវិជ្ជមានជាមួយខ្លួនឯង។ អ្នកអាចនិយាយជាមួយខ្លួនឯងតាមរយៈ ការប្រឈមជាមួយបញ្ហាឬនិយាយអំពីវិធីរបស់អ្នក ក្នុងការវែកញែកអំពីបញ្ហាទាំងនោះឲ្យកាន់តែលម្អិត។
ឥរិយាបទអវិជ្ជមាន មិនគួរអនុញ្ញាអោយមាននៅក្នុងជីវិតរបស់អ្នកទេ វានឹងនាំអោយមិនហ៊ានជំនះទៅរកភាពជោគជ័យ។ ចូរជ្រើសរើសយកឥរិយាបថវិជ្ជមានដើម្បីទទួលបានជោគជ័យ។ នេះមិនមែនមានន័យថាអ្នកត្រូវតែរីករាយគ្រប់ពេលវេលានោះទេអ្នកគ្រាន់តែមិនត្រូវឲ្យអារម្មណ៍អវិជ្ជមានបង្អាក់ស្មារតីអ្នកបានឡើយ។
៩.ចូលរួមក្នុងការធ្វើលំហាត់ប្រាណ
ពុំមានវិធីណាមួយក្នុងការសម្អាតផ្លូវចិត្តរបស់អ្នកផ្សារភ្ជាប់ជាមួយគំនិតច្នៃប្រឌិត បង្កើតថាមពលដល់ខួរក្បាល និងបង្កើនគុណភាពនៃការគេងរបស់អ្នកបានល្អជាងការធ្វើលំហាត់ប្រាណឡើយ។ បង្កើតទម្លាប់ក្នុងការបង្កើន “ភាពរស់រវើក”និងធ្វើឲ្យសុខភាពរបស់អ្នកកាន់តែល្អឡើង មានសុភមង្គល និងអាយុវែង។
ខួរក្បាលមានភាពនឿយហត់ នៅពេលដែលវាចូលរួមក្នុងសកម្មភាព ដែលប្រើប្រាស់ខួរក្បាលជាបន្តបន្ទាប់ខណៈពេលដែលការធ្វើលំហាត់ប្រាណ គឺជាសកម្មភាពដ៏ចាំបាច់មួយ ក្នុងការផ្តល់ថាមពលដល់ខួរក្បាល។ដូច្នេះ ចូរធ្វើលំហាត់ប្រាណបែបណាមួយដែលអ្នកចូលចិត្តជារៀងរាល់ថ្ងៃ។
១០. ចេះជួយអ្នកដទៃវិញ
ដើម្បីទទួលបានភាពជោគជ័យយ៉ាងពិតប្រាកដ អ្នកត្រូវការបេសកកម្មជីវិតមួយដែលឆ្លុះបញ្ចាំងអំពីបំណងក្នុងការបង្កើតការផ្លាស់ប្តូរដ៏ធំធេងមួយនៅក្នុងជីវិតរបស់អ្នកដទៃ។ កត្តាជំរុញដ៏សំខាន់សម្រាប់អ្នក គួរមិនមែនជាការគិតពីមាសប្រាក់ឡើយ ។ ការធ្វើដូច្នេះក្នុងអាជីពរបស់អ្នក នឹងនាំអ្នកទៅកាន់សុភមង្គល ការពេញចិត្តចំពោះខ្លួនឯង និងចំនុចសំខាន់នៃជីវិតដែលអ្នកព្យាយាមស្វែងរក។
ចូរប្រាកដអំពីមូលហេតុដែលអ្នកចង់ធ្វើការងាររបស់អ្នក។ ប្រសិនបើអ្នកត្រូវបានអូសទាញដោយការស្រេកឃ្លានមាសប្រាក់តែមួយមុខនោះអ្វីដែលអ្នកនឹងទទួលបាននោះគឺ ការត្រូវបានពង្វក់ឬដឹកនាំដោយប្រាក់។ អ្នកគួរតែស្វែងរកគំនិតស៊ីជម្រៅនៃចក្ខុវិស័យ និងដឹកនាំវាដើម្បីភាពល្អប្រសើរជាងមុនសម្រាប់ជីវិតរបស់អ្នកដទៃ។
ជាក់ស្តែងណាស់ភាពជោគជ័យ មិនមែនជាអ្វីដែលអ្នកទទួលបាន ដោយការជ្រើសរើសជំរើសពីរបីនោះទេ។យើងទាំងអស់គ្នាមានឱកាសស្មើៗគ្នា។ ចំណុចខុសគ្នាជាចម្បងគឺនៅលើកម្លាំងជំរុញ ឆន្ទះការខិតខំប្រឹងប្រែង និងទម្លាប់រៀងៗខ្លួន។ ដូច្នេះចូរធ្វើជាបុគ្គលម្នាក់ដែលឈានទៅកាន់ភាពជោគជ័យ ដោយមិនមានភាពភ័យខ្លាចមានគោលដៅច្បាស់លាស់ មានភាពអំណត់ មានគំនិតច្នៃប្រឌិត និងដោយឯករាជ្យ។ ទម្លាប់ល្អជាគ្រិះក្នុងការអភិវឌ្ឍសមត្ថភាពរបស់អ្នកឲ្យចំណុចកំពូល៕