គោលដៅអភិវឌ្ឍន៍ប្រកបដោយចីរភាព The Sustainable Development Goals (SDGs) ឬគេអាចស្គាល់ថាជាគោលដៅពិភពលោករួម ត្រូវបានប្រទេសជាសមាជិកនៃអង្គការសហប្រជាជាតិ អនុម័តរួមក្នុងឆ្នាំ២០១៥ ជាការអំពាវនាវរួមសម្តៅទៅរកសកម្មភាព ដើម្បីបញ្ចប់ភាពក្រីក្រការពារភពផែនដី និងធានាថារាល់ប្រជាជននៅទូទាំងពិភពលោកទទួលបានសុខសន្តិភាព និងភាពរីកចម្រើនជារួមនៅឆ្នាំ២០៣០។
ដោយសារគោលបំណងចម្បងខាងលើ ដូចនេះគោលដៅអភិវឌ្ឍន៍ប្រកបដោយចីរភាព ដែលមានចំនួន១៧គោលដៅត្រូវបានបង្កើតឡើង ហើយត្រូវបានគេទទួលស្គាល់ថា សកម្មភាពគោលដៅទាំងនោះរួមបញ្ចូលនិងអនុវត្តក្នុងតំបន់ណាមួយ នឹងមានឥទ្ធិពលទៅលើប្រទេសឬតំបន់ផ្សេងៗទៀត។ បន្ថែមពីនោះ ការអភិវឌ្ឍគោលដៅជាអន្តរជាតិទាំងនោះក៏ត្រូវធ្វើឱ្យមានសមតុល្យរវាងសង្គម សេដ្ឋកិច្ចនិងបរិស្ថានប្រកបដោយភាពយូរអង្វែង។
ដូចនេះដើម្បីទៅដល់គោលដៅសកលខាងលើ នៅត្រឹមឆ្នាំ២០៣០ គឺតម្រូវឱ្យមានការចូលរួមពីមហាជនពីគ្រប់មជ្ឈដ្ឋាន។ បន្ថែមពីនោះភាពច្នៃប្រឌិត ចំណេះដឹង បច្ចេកវិទ្យា និងធនធានថវិកាពីគ្រប់បណ្តាសង្គម គឺជាភាពចាំបាច់ផងដែរដើម្បីជាជំហានឆ្ពោះទៅរកបរិបទគោលដៅជារួមSDGs ។
សម្រាប់គោលដៅសំខាន់ៗចំនួន១៧មានដូចខាងក្រោមនេះ៖
គោលដៅទី១៖ ពុំមានភាពក្រីក្រ: ការបញ្ចប់ភាពក្រីក្រគ្រប់ទម្រង់ទាំងអស់ ដោយធានាថា ភាពក្រីក្រធ្ងន់ធ្ងរត្រូវបានលុបបំបាត់ ហើយភាពក្រីក្រជារួមត្រូវបានកាត់បន្ថយ៥០%។
គោលដៅទី២៖ គ្រោះអត់ឃ្លានស្មើសូន្យ:ការបញ្ចប់ការអត់ឃ្លាន សម្រេចឲ្យបានសន្តិសុខស្បៀងធ្វើឱ្យប្រសើរឡើងស្ថានភាពអាហារូបត្ថម្ភ និងលើកកម្ពស់កសិកម្មប្រកបដោយចីរភាព ដោយធានានូវការទទួលបានស្បៀងអាហារប្រកបដោយសុវត្ថិភាព និងអាហារគ្រប់គ្រាន់សម្រាប់មនុស្សគ្រប់គ្នាគ្រប់ពេលវេលា។
គោលដៅទី៣៖ សុខភាព និងសុខមាលភាពមាំមួន: ធានាឱ្យជីវភាពរស់នៅរបស់ប្រជាជន ប្រកបដោយសុខភាពល្អនិងលើកកម្ពស់សុខមាលភាពរបស់មនុស្សគ្រប់រូប និងគ្រប់វ័យ។
គោលដៅទី៤៖ ការអប់រំប្រកបដោយគុណភាព:ធានាការអប់រំប្រកបដោយ គុណភាព គ្រប់ជ្រុងជ្រោយ សមធម៌និងលើកកម្ពស់ឱកាសសិក្សាពេញមួយជីវិត សម្រាប់ប្រជាជនគ្រប់រូប។
គោលដៅទី៥៖ សមភាពយេនឌ័រ:សម្រេចសមភាពយេនឌ័រ និងផ្តល់សិទ្ធិអំណាចដល់ស្រ្តីនិងកុមារីទាំងអស់។
គោលដៅទី៦៖ ទឹកស្អាត និងអនាម័យ:សកម្មភាពឆ្ពោះទៅរកការទទួលបានជាសកល នូវការគ្រប់គ្រងទឹកស្អាតនិងអនាម័យដោយសុវត្ថិភាព និងការគ្រប់គ្រងធនធានទឹកសមស្រប។
គោលដៅទី៧៖ ថាមពលស្អាតដែលមានតម្លៃសមរម្យ:ផ្តោតទៅលើការទទួលបានសេវាថាមពលទំនើប ដែលមានតម្លៃសមរម្យទុកចិត្តបាន និងមាននិរន្តរភាព។
គោលដៅទី៨៖ ការងារសមរម្យ និងកំណើនសេដ្ឋកិច្ច:ធានាកំណើនសេដ្ឋកិច្ចប្រកបដោយចីរភាព និងគ្រប់ជ្រុងជ្រោយមានមុខរបរពេញលេញ និងផលិតភាព និងមានការងារសមរម្យសម្រាប់ប្រជាជនគ្រប់រូប។
គោលដៅទី៩៖ ឧស្សហកម្ម នវានុវត្តន៍ និងហេដ្ឋារចនាសម្ព័ន្ធ: ផ្តោតលើការអភិវឌ្ឍហេដ្ឋរចនាសម្ព័ន្ធ និងឧស្សាហកម្ម ដែលមានចីរភាពនិងភាពស៊ាំ រួមទាំងសហគ្រាសខ្នាតតូច។ គោលដៅនេះចូលរួមដល់ការស្រាវជ្រាវវិទ្យាសាស្រ្ត និងការធ្វើឱ្យប្រសើរឡើងនូវសមត្ថភាពបច្ចេកវិទ្យានៃឧស្សាហកម្ម។ លទ្ធភាពទទួលបាននូវបច្ចេកវិទ្យាគមនាគមន៍ និងព័ត៌មាន និងការប្រើប្រាស់អ៊ីនធើណេតដែលមានតម្លៃសមរម្យ។
គោលដៅទី១០៖ កាត់បន្ថយវិសមភាព:របៀបវារៈឆ្នាំ២០៣០ ត្រូវបានបង្កើតឡើងដើម្បីឆ្លុះបញ្ចាំងថា សហគមន៍អន្តរជាតិបានធ្វើការបោះជំហានយ៉ាងសំខាន់ ក្នុងការលើកកម្ពស់មនុស្សចេញពីភាពក្រីក្រ។ ទោះជាយ៉ាងណាក៏ដោយវិសមភាពនៅតែមាន ហើយវាមានភាពខុសគ្នាយ៉ាងខ្លាំង ក្នុងការទទួលបានសេវាសុខភាព សេវាអប់រំ និងទ្រព្យសម្បត្តិផ្សេងទៀត។
គោលដៅទី១១៖ ទីក្រុង និងសហគមន៍ប្រកបដោយចីរភាព:ធ្វើឱ្យទីក្រុង និងទីកន្លែងតាំងទីលំនៅថ្មីសម្រាប់ប្រជាជនមានលក្ខណៈ មាំទាំ សុវត្ថិភាព និងមានចីរភាពមានគោលបំណងធ្វើឱ្យប្រសើរឡើងនូវលំនៅដ្ឋាន ការដឹកជញ្ជូនកន្លែងសាធារណៈ និងបរិស្ថានទីក្រុង និងពង្រឹងភាពធន់ទៅនឹងគ្រោះមហន្តរាយ និងការប្រែប្រួលអាកាសធាតុ។
គោលដៅទី១២៖ ការប្រើប្រាស់និងការផលិតប្រកបដោយការទទួលខុសត្រូវ: កាត់បន្ថយកំណើនសេដ្ឋកិច្ចពីការប្រើប្រាស់ធនធាននិងភាពរិចរិលបរិស្ថាន។ ការប្រើប្រាស់និងផលិតកម្មប្រកបដោយចីរភាពពាក់ព័ន្ធ នឹងការលើកកម្ពស់ធនធាននិងប្រសិទ្ធភាពថាមពល ក៏ដូចជាការកាត់បន្ថយថ្លៃដើមនៃសេដ្ឋកិច្ច សង្គមនិងបរិស្ថាន។
គោលដៅទី១៣៖ សកម្មភាពបរិស្ថាន:មានគោលបំណងចាត់វិធានការជាបន្ទាន់ ក្នុងការប្រយុទ្ធប្រឆាំងទៅនឹងផលប៉ះពាល់ នៃការប្រែប្រួលអាកាសធាតុ ដោយអភិវឌ្ឍសមត្ថភាពរបស់ប្រទេសនីមួយៗ ដើម្បីកាត់បន្ថយហានិភ័យអាកាសធាតុនិងការបន្ស៊ាំ។
គោលដៅទី១៤៖ ជីវិតក្រោមទឹក:សំដៅលើអន្តរអំពើរវាងមនុស្ស ជាមួយនឹងមហាសមុទ្រ។ ជាពិសេស វាមានគោលបំណងដើម្បីអភិរក្ស និងគ្រប់គ្រងការប្រើប្រាស់នៃមហាសមុទ្រ សមុទ្រ និងធនធានសមុទ្រសម្រាប់ការអភិវឌ្ឍប្រកបដោយចីរភាព។
គោលដៅទី១៥៖ ជីវិតលើដី:ផ្តោតលើការប្រើប្រាស់ប្រកបដោយចីរភាព នូវជីវចម្រុះនៅលើដែនដីគោក និងប្រព័ន្ធអេកូឡូស៊ី ដូចជាព្រៃឈើ វាលស្មៅវាលខ្សាច់ និងតំបន់ភ្នំ ព្រមទាំងទំនាក់ទំនងរបស់វាជាមួយប្រព័ន្ធទឹកសាប។
គោលដៅទី១៦៖ សន្តិភាព យុត្តិធម៌ និងស្ថាប័នរឹងមាំ:លើកកម្ពស់សង្គមដែលមានសន្តិភាព និងប្រកបដោយលក្ខណៈចម្រុះដើម្បីការអភិវឌ្ឍប្រកបដោយចីរភាព ផ្តល់នូវការទទួលបានយុត្តិធម៌សម្រាប់ប្រជាជនគ្រប់រូប និងកសាងស្ថាប័នដែលមានប្រសិទ្ធភាព គណនេយ្យភាពនិងការរួមបញ្ចូលគ្នាគ្រប់កម្រិត។
គោលដៅទី១៧៖ ភាពជាដៃគូ ដើម្បីសម្រេចគោលដៅ:ពង្រឹងមធ្យោបាយអនុវត្តនានា និងបង្កើតភាពរស់រវើកនៃភាពជាដៃគូសកល សម្រាប់ការអភិវឌ្ឍប្រកបដោយចីរភាព ដែលស្តីអំពីការសហការគ្នារវាងរដ្ឋាភិបាល សង្គមស៊ីវិល ស្ថាប័នឯកជន និងភាគីផ្សេងៗ ដើម្បីសម្រេចបាននូវក្របខណ្ឌអភិវឌ្ឍឆ្នាំ២០៣០៕